Muqdisho(RBC Radio) Ciidamada ilaalada wadooyinka ayaa maanta soo bandhigay gaadiid xamuul ah oo ay kasoo qabteen albaabka laga galo dekedda magaalada Muqdisho taliyaha ciidamada ilaalada wadooyinka ee Taraafikada Cali Xirsi Barre Cali Gaab oo saxaafada shir jaraa’id ugu qabtay xafiiskiisa ayaa sheegay iney soo qabteen gaadid xamuul ah oo uu sheegay iney jabiyeen shuruuc ay dhawaan soo saareen.
Taliyaha ayaa sheegay in gaadiidka laga soo qabtay albaabka dekedda xili ay damacsanaayeen iney gudaha dekedda galiyaa xamuul ku rarnaa oo uu ku sheegay Liin-dhanaan iyo Sisin laga dhoofinayey dekedda Muqdisho.
Cali Gaab ayaa ku micneeyey sababta ay u soo qabteen gaadiidka iney tahay kadib markii sida uu sheegay ay hareer mareen Sharci ay dhawaan soo saareen oo ahaa inaan gaadiidka lagu rarin xamuul ka badan tankooda.
Gaadiidka ay soo bandhigeen ciidanka Taraafika ee ilaalada wadooyinka ayaa ahaa 6 gaari kuwaas oo markii hore kasoo kici timay gobolka Shabeelaha Hoose ,Taliyaha Ciidamada ilaalada wadooyinka Cali Xirsi Barre ayaa sheegay iney soo qabanayaan cid kasta oo ku xad gudubta shuruucda ay soo saareen wuxuuna shaaca ka qaaday iney ganaax adag dul dhigayaan gaadiidkan ay gacanta kusoo dhigeen.
RBC Radio
Xafiiska Wararka Muqdisho
Use Facebook to Comment on this Post
