Garoowe (RBC RADIO) Musharax C/Raxmaan Cuuke oo maanta si diiran loogu soo dhaweeyey Magaalada Garoowe Taageerayaal bandanna ay uga hortageen Duleedka Magaalada isagoo kasoo kicitimay Magaalada Gaalkacyo ayaa mar uu dadka kula hadlayay Barxada wuxuu sheegay in Laan dheeree iyo Laan gaab uusan jiri doonin hadii xilka loo dhiibo uuna samayn doono waxa ay dadku u baahan yihiin oo ah Hormar Cadaalad iyo Walaalnimo sida uu Musharaxu yiri.
“ Waxaad la socotaan in Faroole faanayo Gaas faanayo Cali Xaaji Faanayo cuuke Faanayo laakiin Musharaxiinta su’aalo weydiiya oo mid mid uga waraysta qof walba wuxuu qabtay waxay ila tahay in uu soo baxayo ninka siyaasada Soomaliya ku fashilmay ee halkaan hunguriga usoo doontay waana la kala baxayaa oo waxaa imaanaysa Xaqiiqda sidaana waxaa yiri Musharax Cuuke.
Mudane Cuuke wuxuu sheegay in Magaalada Garoowe ay ku sugan yihiin dad sheegta in ay soomaliya wax usoo qabteen Waxbarashadi dalka kaabeen burcad badeeda la dagaalameen xiligii xilka ay ka hayeen Dowlada Soomaaliyeed Balse dadkaasi waa kuwa doonaya Burburka Puntland ayuu yiri Musharaxu.
“ Kuwii hantida dalka cunay daacad nimo aan kasoo shaqayn Ardaydii Puntland ka hor istaagay deeqihi wax barasho kala furfurka Puntlandna ka shaqeeyey ayaa Garoowe jooga oo raba in ay Puntland hogaamiyaan iyagoo siyaasadi Dowladii KMG ahayd kusoo fashilmay ma kuwaas ayaan dib u dooranaa ma kuwaas ayaan markale dalkii ay ka hiiliyeen aaminnaa ma kuwaas ayaan fursad kale siinnaa Jawaabtu waa maya ma siinayno mana dhacayso inaan mar kale Aaminno ayuu yiri Mudane Cuuke.
Musharaxa oo si cad u muujinayay Sida uu uga soo horjeedo Musharax C/wali Maxamed Cali Gaas oo isagana xilkan u taagan ayaa si cad u muujiyay in Masuulkaasi uu is hortaagay wax tar badan oo shacabka Puntland ay heli lahaayeen uuna horseedi gaaray in Puntland ay burburto sida uu hadalka u dhigay wuxuuna si caro leh u sheegay in Dadka caynkaasi ah aysan u qalmin in kalsooni la siiyo.
“Aniga sida raga Qaarkii oo markay magaalada soo galayeen soo kaxaystay Tiknikooyin oo Garoowe Cabsi ka muujiyay kuna kalsoonaan waayay maahi Garoowe waa Caasimadaydi dadka joogana waa dadkeygi Gaalkacyo waa Magalaadaydi Qardho waa hoygeygi Boosaasana waa xarunteydi Laas caanana waan ku dhex lugeen doonaa meel kasta oo Puntland ay leedahay waa dalkeygi shacabkana kama cabsado sida dadka qaar ay sameeyaan ayuu yiri Musharax Cuuke.
Musharaxan oo ah kan ugu dhalinyarsan Musharaxiinta isa soo sharxay ayaa sheegay in dhalinyarada Fursadoodii la gaaray oo dadka waa wayn ay Dhalinyarada Fursad siiyaan si loo helo buu yiri Maskax fayoow, wuxuuna tilmaamay in uu Qaban doono kulamo kala duwan oo uu kusoo bandhigayo wax qabadkiisa.
Ibrahim Wadani
RBC RADIO
Xafiiska Wararka Garoowe.
Use Facebook to Comment on this Post
