Muqdisho(RBC Radio) Fanaanada Soomaaliyeed ee caanka ah Hibo Maxamed Gudoon Hibo Nuura ayaa si diiran loogu soo dhaweeyey magaalada Muqdisho ee caasimadda Soomaaliya oo ay muddo dhowr iyo Labaatan sano kadib dib ugu soo laabatay,soo dhaweynta fanaanada ayaa waxaa ka qaybagalay fanaaniinta hobolada qaranka Waaberi,maamulka gobolka Banaadir,Xildhibaano iyo dadweyne Soomaaliyeed.
Markii ay kasoo dagtay garoonka diyaaradaha magaalada Muqdisho ee Aadan Cadde ayaa waxaa warbaahinta la hadlay afhayeenka maamulka gobolka Banaadir Maxamed Yuusuf Cismaan,wuxuuna sheegay iney ku faraxsan yihiin imaanshaha magaalada Muqdisho ee fanaanada qaranka Soomaaliyeed Hibo Maxamed Gudoon.
Afhayeenka maamulka gobolka Banaadir ayaa sheegay in maamulka gobolku uu fanaanada ku casuumay caasimadda Muqdisho,wuxuuna tilmaamay in imaatinkeedu uu astaan u yahay amniga iyo horumarka ka jira magaalada Muqdisho.
Mulaxamiistaha weyn C/kariin Faarax Qaarey Jiir oo ka mid ahaa dadkii garoonka kusoo dhaweeyey fanaanada Hibo Nuura ayaa sheegay in Hibo Nuura ay tahay fanaanad Miisaan weyn ku leh fanka Soomaaliya,wuxuuna tibaaxay iney leedaha iftiinka Fanka Soomaaliyeed sida uu sheegay,wuxuuna ku kaftay in Hibo uu Aabeheed ula baxay Sucaado balse uu fanka Soomaaliyeed u bixiyey magaca Hibo Nuura.
Hibo Nuura oo hadal kooban bixisay ayaa ka mahad celisay soo dhaweynta loo sameeyey iyo casuumadda uu maamulka gobolka Banaadir u fidiyey,waxayna goobta kasoo jeedisay Suugaan ay ku cabiraysay dareenkeeda oo u badneed Alla bari iyo Duco,waxayna sheegtay iney muddo dheer u hamuun qabtay iney dalkeeda dib ugu soo laabato.
Fanaanada ayaa sheegtay inuu dalku ka mid yahay dalalka ugu khayraadka badan Afrika,waxayna kula dardaarantay ummadda Soomaaliyeed iney ka shaqeeyaan sidii dalka looga saari lahaa dhibaada uu ku raagay,waxayna Alle uga barisay inuu dalka nabadeeyo.
Muqdisho oo laga dareemayo isbedel dhanka amniga ah ayaa waxaa mudooyinkii danbe kusoo qulqulayey Qurbajoog ganacsiyo baaxad leh magaalada ka abuuray iyo dad magacweyn ku dhex leh bulshada Soomaaliyeed,walow ay mararka qaar magaalada ka dhacaan falal liddi ku ah amniga.
RBC Radio
Xafiiska Muqdisho
Use Facebook to Comment on this Post
