Muqdisho{RBC Radio} Dowladda Maraykanka ayaa ballan qaaday iney Safaaradeedii dib uga furan doonto magaalada Muqdisho ee caasimadda Soomaaliya afhayeenka madaxtooyada Soomaaliya ahna la taliyaha madaxweynaha Jamhuuriyadda federaalka Soomaaliya Inj.C/raxmaan Cumar Yariisow ayaa sheegay in Safiirka Maraykanka ee Soomaaliya oo shalay Muqdisho soo gaaray uu ballan qaaday iney sida ugu dhaqsaha badan dib ugu furan doonaan Safaaradooda.
Inj.C/raxmaan Cumar Yariisow ayaa tilmaamay in Safiirka Soomaaliya u fadhiya dowladda Maraykanku uu ka dhawajiyey in dalkiisu uu dib usoo nooleynayo xiriirkii kala dhexeeyey Soomaaliya kaasoo meesha ka baxay markii ay burburtay dowladii dhexe ee Soomaaliya bilowgii Sagaashamaadkii.
Afhayeenka Madaxtooyada ayaa tilmaamay in Maraykanku uu sidoo kale ballan qaaday inuu soo celinayo taageeradii dhaqaale iyo midii Siyaasadeed uu siin jiray Soomaaliya,Inj.Yariisow ayaa xusay in Maraykanku uu xiligan usoo jeestay caawinta dowladda federaalka Soomaaliya ee uu hogaaminayo Madaxweyne Xasan SH Maxamuud.
C/raxmaan Cumar Yariisow ayaa tilmaamay in taageerada Maraykanku ay macno weyn ugu fashiso dowladda Soomaaliya maadaama Maraykanku uu yahay dalka ugu tunka weyn dunida,wuxuuna tilmaamay in Soomaalidu ay ka faa’iideysan doonto taageerada ay ula heelan tahay dowladda Maraykanka.
Dowladda Maraykanka ayaa ka cagajiideysay arimaha Soomaaliya tan iyo wixii ka danbeeyey hawlgalkii UNSOM ee maraykanku hogaaminayey xiligaas oo foodda ay isdareen Maleyshiyaad Daacad u ahaa Gen. Maxamed Faarax Caydiid iyo Marayekanka uu ku fashilmay hawlgalkaas ayaa mudooyinkii danbe si aan toos ahayn ugu lug lahaa Siyaasadda Soomaaliya.
RBC Radio
Xafiiska Muqdisho
Use Facebook to Comment on this Post
