DIRICNIMADA KENYA & DOQONIMADA SOOMAALIDA! ( Qaadka )
Abukar Awale ( qaad Diid )
abukar_aw@yahoo.co.uk
Luulyo 19 2013
Tan iyo maalinkii lagu dhawaaqay in dowlada ingiriisku wadankeeda ka mamnuucday qaadka ayaa waxaa isa soo taraya guuxa iyo bulaanka kasoo teeraya beeraleyda Kenya iyo madaxda iyo masuuliyiita Kenya oo iyagu daddaal weyn igu jira sidii go,aankaas looga noqon lahaa.
Inkastoo arintaasi aanay dhici doonin qaadkuna joojsan doono billaha soo socda hadii alle idmo , ayaa waxaan qirayaa in Kenyaatigu dagaalameen oo daddaaleen inay ganacsigooda difaacdaan.waana qayb kamida diricnimada aan kenyaatiga ku tilmaamayo.
Waa sida uu qoray joornaalka daily Nation ee kasoo baxa Kenya madaxda Kenya qaarkood waxay ku doodayaan, ingiriiska maxaa kagalay caruurta cadaanka ahi qaad ma cunto, waxa qaadka cuna waa Soomaali, wadankoodana si sharci ah ayaa lagu geeyaa,kamana hadli karaan.
Hadalka hadaan sida kale u dhigana Kenyaaatigu waxay ku doodayaan xoolahan ( soomaalida ) anakay noo daaqaane ingiriisoow noodaaya aan daajinee doolarkana ka guranee.
Waxaa yaab iyo mamakaag ah , oo ah runtii , oo ah wax laga xishoodo ah, dad lagu gorgortamayo, oo Kenya leedaha iidaaya aan dilee , ingiriisna leeyahay iska daaya masaakiinta, naf kuma harine. Oo iyagii aan warkooda lahayn.inkastoo madaxda Kenya dagaal ugu jirto in go,aankii qaad joojinta laga noqdo ,ilaa iyo hada lama hayo, HAL masuul oo dowladaha Soomalida ah oo soo dhaweeyey arintaan lagu tilmaami karo guul weyn Soomaali usoo hoyatey.
Hadaba waa su,aale ma caqli xumo ayey katahay madaxdeena ? Mise cabsi ayaa jirta ? maxaase laga yeli doonaa beeraleyda qaadka Kenya ee u goonineysa qaadka Soomaaliya la geeyo ayaan sadex jibaari doonaa , marka qaadki ka istaago UK.maxaa madaxdii dowlada federaalka ku dhacay ?
Waxaa xusid mudan oo aan ku timaami karaa ( xildhibaano Xaniiyo leh ) labada xildhibaan eek ala ah, Diiriye Abdulaahi Mohamed Xildhibaan koonfurta wajeer, iyo Xildhibaan maxamed shidiye ( lagadera ) labadaas xildhibaan oo ah soomaalida Kenya ayaa si xaniiyo , karti,iyo hufnaaba leh ugu dhiiraday in ay soo dhaweeyeen qaadka laga joojiyey UK, waxay kaloo baaqooda ku dareen in Xitaa gudaha Kenya qaadka laga mamnuuco.iyagoo og in waxa dhibani ay yihiin Soomaali.
Dhanka kalena waxaan hadaan nahay bahda la dagaalanka qaadka kujirnaa heegan aan ku difaacayno weerarada warbaahinta la isu marinayo baaqyo kala duwana loo dirayo dowlada ingiriiska, dhankayaga waxaan ilaa hada soo aruurinay waraaqo ka kala socda jaaliyadaha Soomaalida ah ee UK , kuwaasoo dhambaal iyo mahadnaq u diraya wasiirada arimaha gudaha ee UK.
Waxaan ku kalsoonahay inaan difaacan karno maatayada qube joogta ah, oo aan qaad danbe loo keeni doonin, laakiinse waxaa sidoo kale laga rabaa madaxda Soomaaliyeed inay u hiiliyaan oo difaacaan Caruurta Soomaaliyeed oo Midiyaha loo soo soofeysanayo, diyaaradaha Sunta ahna loogu keenayo wadankooda. Hadii kale , aan qirano , Madaxda Kenya waa diricyo, kuwa Soomaaliduna Waa doqomo
Abukar Awale ( qaad Diid )
Godoomiyaha la dagaalanka qaadka .
https://twitter.com/Abukarawale
========================================
QORAAGA AYEY U GAAR TAHAY QORAALKAAN LOOMAMA FASIRAN KARO TAN RAXANREEB.COM CIDII RABTA IN AY SI GAAR AH MAQAAL AMA FIKRAD U SOO DIRTO RAXANREEB WAXAA LOOGU SOO HAGAAJIN KARTAA ADMIN@RAXANREEB.COM
Use Facebook to Comment on this Post
