Muqdisho(RBC Radio) Gudoonka baarlamaanka Soomaaliya ayaa xalay casha sharaf magaalada Muqdisho ugu sameeyey gudoomiyaha baarlamaanka Carabta Axmed Maxamed Jarwaan oo shalay soo gaaray magaalada Muqdisho ee caasimada Soomaaliya,gudoomiye ku xigeenka koowaad ee golaha baarlamaanka Soomaaliya Jaylaani Nuur Iikaroo munaasabada casha sharafta ka hadlay ayaa sheegay iney sharaf weyn u tahay baarlamaanka iney Muqdisho kusoo dhaweeyaan gudoomiyaha baarlamaanka Carabta iyo xildhibaanada carbeed ee ku wehlinaya safarkiisa.
Afhayeenka baarlamaanka Soomaaliya Maxamed Sheekh Cismaan Jawaari ayaa sheegay in booqashada gudoomiyaha baarlamaanka Carabta ee Muqdisho ay tahay mid taariikhi ah,wuxuuna uga mahad celiyey safarka ay Muqdisho ku yimaadeen.
Maxamed Sheekh Cusmaan Jawaari ayaa hoosta ka xariiqay in Soomaaliya ay xiligan u baahan tahay taageero ay ka hesho walaalaheeda Carbeed”Isweydiin malaha in Soomaaliya ay maanta u baahan tahay walaal si dhab ah ula duubta oo la garab gala halganka hayaanka aynu ku jirno” ayuu yiri gudoomiye Maxamed Sheekh Cismaan Jawaari.
Axmed Maxamed Jarwaan ayaa ka mahad celiyey sida wanaagsan ee magaalada Muqdisho waftigooda loogu soo dhaweeyey ,wuxuuna shaaca ka qaaday iney indhahooda ku arkeen horumarka la taaban karo ee dalka ka socda,wuxuuna ballan qaaday iney is garab taagi doonaan shacabka iyo dowlada Soomaaliyeed.
RBC Radio
Xafiiska Wararka Muqdisho
Use Facebook to Comment on this Post
