Bakool(RBC Radio) Dagaal culusu oo saacado badan socday ayaa xalay ka dhacay gobolka Bakool,dagaalka ayaa ka dhacay degmada Tiiyeglow ee gobolkaasi ciidamada dowlada Soomaaliya oo si aad ah u hubeysan ayaa duullaan ku qaaday degmada Tiiyeglow oo ay 4-tii sano ee ugu danbeeyey ay maamulayeen dhaq-dhaqaaqa alshabaab ee ka dagaalama Soomaaliya.
Ciidamada dowlada Soomaaliya ayaa dagaalka kasoo qaaday dhanka degmada Ceel-barde ee gobolkaas,ciidamada ayaa markii ay soo gaareen duleedka degmada Tiiyeglow waxa ay foodda isdareen dagaalamayaasha alshabaab oo isku dayey iney difaacdaan gacan ku haynta degmada Tiiyeglow ee gobolka Bakool waxaana halkaasi ku dhexmaray dagaal qaraar oo geystay dhimasho iyo dhaawac kala gaaray dhinacyadii dagaalamay
Wararka kasoo baxay dagaalka ayaa sheegay in dagaalku uu geystay dhimashada 10 ruux oo u badnaa dhinacyadii dagaalamay waxaana ka dhashay dhaawac intaa in ka badan,Saraakiisha hogaaminaya ciidamada dowlada Soomaaliya ee dagaalka la galay alshabaab ayaa sheegay iney si buuxda ula wareegeen gacan ku haynta degmada Tiiyeglow iyo nawaaxigeeda.
Gudoomiye ku xigeenka degmada Xudur ee xarunta gobolka Bakool Mustaf Aadan oo warbaahinta la hadlay ayaa sheegay in ciidamada dowlada Soomaaliya ay la wareegeen degmada Tiiyeglow oo qiyaastii 90-KM u jirta xarunta gobolka Ee Xudur,wuxuuna shaaca ka qaaday in ciidanka dowladu ay dagaalka Tiiyeglow ka gaareen hadafkii ay ka lahaayeen oo ahaa iney alshabaab ka saaraaan degmadaas sida uu tilmaamay.
Use Facebook to Comment on this Post
