Muqdisho(RBC Radio) Roob Lixaad leh oo xalay ilaa saaka aroortii hore ka da’ayey magaalada Muqdisho iyo nawaaxigeeda ayaa saamayn ba’an ku yeeshay kumanaan ruux oo barakacayaal ah kuwaas oo ku dhibaateysan magaalada Muqdisho,Rooobka ayaa burburiyey inta badan aqaladii cooshada ka samaysnaa ee ay gabbaadka ka dhiganayee.
Barakacayaasha ayaa waxaa soo food saartay xaalad nololeed oo aad u adag,waxaana saaka ay dadkani daadsan yihiin bannaanada caasimada Muqdisho kadib markii ay biyuhu buux dhaafiyeen xeryihii barakac ee ay ku noolaayeen isla markaane uu roobku burburiyey guryihii ka samaysnaa bacaha iyo cooshadaha oo aan awalba awood u lahayn iney celiyaan dhibicda roobka.
Barakacayaasha ayaa ka dalbaday shacabka iyo dowlada Soomaaliyeed iney gargaar lasoo gaaraan isla markaane ay ka jawaabaan dhibaatada ku haysata gudaha Muqdisho,waxayna sidoo kale hay’adaha gargaarka ay ka codsadeen iney lasoo gaaraan gurmad deg deg ah.
Dadkan ayaa ilaa xalay soo jeed waagu ugu baryey,waxaana xusid mudan in dadkan barakacayaasha ah ay marti u ahaayeen dhibicda iyo dhaxanta roobka maadaama aysan haysan hooy ay galaan qabowga roobabka da’aya.
RBC Radio
Xafiiska Wararka Muqdisho
Use Facebook to Comment on this Post
