Baydhabo (RBC) Wararka naga soo gaaraya gobollada Baay iyo Bakool ee koonfurta dalka ayaa sheegaya in dagaalo u dhexeeya ciidamada dawlada iyo kuwa Al Shabaab ay ka dheceen deegaano kala duwan maanta iyo shalay.
Deegaanka Kulan Jareer oo ka tirsan gobolka Bakool ayaa la soo sheegayaa in dagaal uu ka dhacay saaka kadib markii ciidamada dawlada Soomaaliya ee hoostaga maamulka gobolka Bakool ay weerareen deegaankaasi oo Al Shabaab ay ku sugnaayeen. Dagaalkan waxaa uu sababay dhimasho iyo dhaawac an la xaqiijin tirada guud ee ay gaarsiisan tahay.
Dhinaca kale deegaanka Hagarka oo u dhow deegaanka Iidaale oo ka tirsan gobolka Baay ayaa dagaal kale uu ka qarxay saaka kadib markii ciidamada Al Shabaab ay weerar soo qaadeen.
Dagaalka saaka ayaa dabajooga mid shalay halkaasi ku dhexmaray labada dhinac,sida ay sheegayaan masuuliyiinta ku sugan magaalada Baydhabo.
Ugu yaraan afar ruux oo labada dhinac ee dagaalamay ayaa la xaqiijiyey inay ku dhinteen dagaalkan.
Wararka ugu dambeeya ee ka imaanaya deegaanada lagu dagaalamay ayaa sheegaya in weli xiisad dagaal ay ka jirto halkaasi dhinacyada dagaalamayna ay weli kala joogeen meelihii ay horey u joogeen.
RBC Radio
Use Facebook to Comment on this Post
