Caabudwaaq(RBC Radio) Shacabka degmada Caabudwaaq si weyn uga careysan dil loo geystay mid ka mid ahaa dhaqaatiirta ugu caansanaa degmada Caabudwaaq ee gobolka Galgaduud banaanbaxa ayaa waxaa ka qaybgalay maamulka degmada iyo qaybaha kala duwan ee bulshada magaalada Caabudwaaq.
Banaanbaxayaasha ayaa si weyn uga careysnaa dil ay ciidanka Ethiopia gaar ahaa kuwa loo yaqaano New Police oo hoos taga ismaamulka Soomaalida Ethiopia ay u geysteen Dr Axmed Sheekh Faarax,ciidanka Ethiopia ayaa Dhaqatrka ku dilay gudaha degmada Caabudwaaq iyagoona markii ay dileen hore usii qaatay Maydka Dr Axmed Sheekh Faarax.
Gudoomoiyaha degmada oo warbaahinta uga warbixiyey dibadbaxa maanta ka dhacay magaalada caabudwaaq iyo dilka ay ciidanka New Police u geysteen Dr Axmed Sheekh wuxuuna sheegay in weerarkaasi uu ahaa mid foolxun oo lagu curyaaminayo bulshada magaalada Caabudwaaq,wuxuuna tilmaamay in maamulkiisu isku dayey iney gacanta kusoo dhigaan ciidankii dilka u geystay Dhaqtar balse aysan u suurta galin arintaasi.
Gudoomiye Axmed Naasir Jaamac ayaa sheegay in shacabku ay iskugu soo bexeen iney muujiyaan dareenkooda ku aaddan dilka gardarrada ah ee ciidamada Ethiopia ay u geysteen Dr Axmed Sheekh Faarax,wuxuuna ku tilmaamay falkaasi mid aysan aqbali doonin maamulka iyo bulshada degmada Caabudwaaq.
Axmed Naasir gudoomiyaha degmada Caabudwaaq ayaa sheegay in si wanaagsan loo garanayo ciidankii dilka geystay wuxuuna intaa ku daray iney isku hawleen soo qabashada ciidankii dilka geystay balse waxa uu tilmaamay iney ka gudbeen xuduudka kala qaybiya Soomaaliya iyo Ethiopia, Waa markii ugu horeysay ee ciidamada New police ay dil iyo dhibaato ka geystaan gudaha dalka Soomaaliya.
RBC Radio
Xafiiska Wararka Muqdisho
Use Facebook to Comment on this Post
