Garbahaarey (RBC) Guddoomiyaha gobolka Gedo Maxamed Cabdi Kaliil ayaa sheegay in maamulka gobolkiisa ay tallaabo ka qaadi doonaan xubno ka tagay Gedo oo ka qeybgalaya shirka magaalada Kismaayo ee maamul u sameynta Jubbooyinka.
Maxamed Cabdi Kaliil oo qadka telefoonka kula hadlay idaacadaha gudaha ayaa sheegay inuusan jirin qof ka wakiil ah gobolka Gedo oo ka qeybgalaya shirka Kismaayo.
“Xubnaha tagay Kismaayo ee la sheegayo inay Gedo ka tageenna kuma soo laaban karaan gobolka, hadday isku dayaana tallaabo adag oo sharciga waafaqsan ayaa laga qaadayaa.” ayuu yiri Maxamed Cabdi Kaliil oo toddobaadkii hore markale loo magacaabay guddoomiyaha gobolka Gedo.
Guddoomiyuhu wuxuu ku celceliyey in gobolka Gedo uu leeyahay hal maamul oo sharci ah, sida uu yiri. Wuxuu sheegay in maamulka Gedo aan loo aaneyn karin dad aan xil u heyn.
Dhowaan ayaa magaalada Kismaayo ee xarunta gobolka Jubbada Hoose waxaa lagu soo dhoweeyay wafdi ay ku jiraan odayaal dhaqameed iyo siyaasiyiin ka soo jeeda gobolka Gedo kuwaasoo illaa hadda ku sugan Kismaayo kana qeybgalaya shirka maamul u sameyna Jubbooyinka oo gobolka Gedo uu qeyb ka yahay ee halkaasi ka socda.
Shirka Kismaayo waxaa sidoo kale diidan dawlada federaalka Soomaaliya oo ku doodeysa inaanu shirkaasi waafaqsaneyn dastuurka federaalka.
Maamulka Kismaayo ayaa qaba in gogosha shirka Kismaayo ay dhigteen dadka deegaanka oo ka arrinsanayo aayaha deegaanka iyagoo dawladana ka dalbaday inay kala soo qeybgasho.
RBC Radio
Use Facebook to Comment on this Post
