Shirka IGAD waxaa dawlada Soomaaliya uga qeybgalaya wasiirka arrimaha dibadda Fawsiya Yuusuf.
Addis Ababa (RBC) Dawlada Federaalka Soomaaliya ayaa shir ay iyada dalbatay oo ka socda magaalada Addis Ababa ee xarunta wadanka Ethiopia horgeysay codsi ah in lagu soo wareejiyo qorshaha maamul u sameynta gobolka Jubbada Hoose.
Shirkan oo maanta furmay ayaa waxaa ka qeybgalaya wasiirada arrimaha dibadda ee toddobada xubnood ee xubnaha ka ah Urur Goboleedka IGAD waxaana dhanka dawlada federaalka Soomaaliya uga qeybgalaya raysul wasaare ku xigeenka ahna wasiirka arrimaha dibadda Fawsiya Yuusuf Xaaji Aadan.
Wasiir Fawsiya oo shalay ka dhooftay magaalada Muqdisho ayaa ka hor safarkeeda waxay wariyaasha ugu sheegtay garoonka diyaaradaha Muqdisho in shirka Addis Ababa uu ku saleysan yahay hindise ka yimid dawlada Soomaaliya oo la xiriira qorshaha Xasilinta iyo Dejinta ee Heer Qaran [NATIONAL SECURITY AND STABILIZATION PLAN NSSP] kaasoo la dejiyey sanadkii 2011 xilligii dawladii ku-meelgaarka ahayd.
Wasiir Fawsiya ayaa sheegtay in dawlada Soomaaliya ay diiday in qorshahan Xasilinta iyo Dejinta ay maamulaan dawladaha deriska la ah Soomaaliya oo xubno ka ah Urur Goboleedka IGAD.
Dhanka kale wararka naga soo gaaraya shirkan wasiirada arrimaha dibadda IGAD uga socda Addis Ababa ayaa sheegaya in dawlada Soomaaliya ay miiska keentay cabasho ku aadan in faragelin lagu hayo xasilinta dalka, isla markaana dawladu ay dooneyso in maamul u sameyn Jubbooyinka lagu soo wareejiyo.
Danjiraha Soomaaliya u jooga Addis Ababa Siciid Yuusuf Nuur oo u waramay idaacadda VOA ayaa sheegay inaysan jirin sabab dawlada Soomaaliya u codsato inay maamusho dalkeeda, isla markaana wuxuu danjiruhu beeniyey in gobol gaar ah oo Soomaaliya ka mid ah looga hadlay shirka wasiirada arrimaha dibadda IGAD.
Use Facebook to Comment on this Post
