Ku: Guddiga ku meel gaarka ah ee doorashooyinka Puntland (TPEC)
Ku: Wakiillada Midowga Yurub
Ku: Hay’adda “ interpeace”
Ujeeddo: Qaadacaad Doorashooyinka Deegaanada Puntland
Sidaad ka warhaysaan hannaanka xisbiyada badan ee Puntland laga bilaabay wuxuu soo dhoweyn ka helay inta badan dadka reer Puntland. Ururuka Midnimo-na wuxuu ka mid ahaa ururadii siyaasadeed ee loo dhisay ka qaybqaadashada hannaan siyaasadeed oo ku dhisan tartan xor ah in loo galo maamulka dalka. Kuma jirin qorshayaasha Ururka Midnimo inuu ka qaybqaato doorashooyin qorshe gaar ah laga leeyahay.
Haddaba anigoo ku hadlaya magaca Ururka Midnimo, tixraacayana go’aankii golaha dhexe, waxaan u sheegayaa Guddiga ku meel gaarka ah ee doorashooyinka Puntland in Ururuka Midnimo go’aansaday inuusan ka qayb-galin doorashooyinka deegaanka ee la damacsan yahay in laga sameeyo Puntland bilaha soo socda. Go’aankaan Ururuka Midnimo ku qaadacayo doorashooyinka laga abaabulayo Puntland waxaa dhaliyey arrimaha hoos ku xusan:
- Waxaa xusid mudan in guddiga doorashooyinka, golaha xukuummadda iyo barlamaanku ka saareen xeerka doorashooyinka dhammaan qodobbadii saldhigga u ahaan lahaa habsami u socodka doorashooyinka ee hore loo ansixiyey, kuwaasoo lagu xakamayn lahaa musuqmaasuq ka dhaca xarumaha codbixinta oo ay ugu dambaysay saaridda warqaddii aqoonsiga iyo diiwaangalinta codeeyaha.
- Guddiga ku meel-gaarka ah ee doorashooyinka oo aan ahayn guddi dhexdhexaad.
- Maxkamadii dastuuriga ahayd oo kala saari lahayd kilaafaadka doorashooyinka oo aan la dhisin ilaa hadda.
Arrimahaas awgood, waxaa Ururka Midnimo ku adkaatay inuu ka qayb galo doorashooyin sida hadda muuqata aysan dadweynaha reer Puntland intooda badani ka qayb qaadaneyn, ama ku qanacsanayn, lagana yaabo inay waxyeelo u gaysato nabadda iyo degganaanshaha ka jirta Puntland
Marka la eego arrimaha aan kor ku soo sheegnay iyo danayn la’aanta guddiga doorashooyinka iyo xukuummadda in la sameeyo doorasho hufan oo xor ah, kuna dhisan rabitaanka dhabta ah ee bulshada reer Puntland, waxaa Ururuka Midnimo go’aansaday inuu qaadaco doorashooyinka deegaanka ee lagu tallo jiro in laga sameeyo Puntland bilaha foodda ina ku soo ahaya inta laga helayo qodobada aasaaska u ah doorasho caddalad ah.
Ugu dambayntii, Ururuka Midnimo wuxuu mahad-naq ballaaran u soo jeedinayaa howlwadeennadii iyo taageerayaashii Ururuka oo si firfircoon uga qayb-qaatay dhismaha Midnimo. Waxaan kaloo ugu baaqaynaa dadweynaha reer Puntland in ay ka shaqeeyaan midnimadooda iyo xasiloonida waddanka.
Mahadsanidin,
Guddoomiyaha Ururka Midnimo
Dr. Saadiq Maxamed Axmed
Faafin, RBC RADIO
Use Facebook to Comment on this Post
