Muqdisho(RBC Radio) Waxaa caadi kusoo laabtay habsami u socodka hawlaha garoonka diyaaradaha magaalada Muqdisho oo maanta muddo saacado ah hakad la galiyey kadib markii la sheegay in gudaha garoonka lagu arkay gaari miineysan oo markii danbe beenoobay,barqanimadii maanta ayaa waxaa mar qura istaagay gabi ahaan hawlihii garoonka caalamiga ah ee Aadan cadde kadib markii uu soo baxay war sheegaya in gudaha garoonka uu yaalo gaari Miineysan.
Saraakiisha garoonka ayaa dhamaan shaqaalaha iyo gaadiidka yaalay gudaha garoonka ku amray in banaanka loo saaro si looga fogaado khasaare kasoo gaaray gaariga miineysan ee la sheegay inuu ku jiray garoonka magaalada Muqdisho.
Mar kaliya ayaa waxaa soo baxay war tilmaamaya in gaari nuuca Booyada ah oo ay leedahay shirkada gacanta ku haysa maamulka garoonka ee SKA oo yaalay gudaha garoonka ay ka buuxaan waxyaabaha qarxa taasoo keentay in amar lagu bixiyo in dhamaan hawlaha garoonka uu xayiran yahay inta uu socdo baaritaanka lagu ogaanayo arintaasi.
Markii uu soo dhamaaday baaritaanka oo ay sameeyeen ciidamada nabad ilaalinta midowga arika ee Amisom iyo ciidamada booliska Soomaaliyeed ayaa waxaa saxaafada la hadlay taliyaha ciidamada Amisom Col. Cali Aadan Xumud oo sheegay inuu beenoobay warka sheegaya in gaariga SKA ay saaran yihiin waxyaabaha qarxa oo la doonayey in lagu qarxiyo gudaha garoonka,waxaana intaa kadib si caadi ah u bilowday hawlihii garoonka ee hakadka la galiyey.
RBC Radio
Xafiiska Wararka Muqdisho
Use Facebook to Comment on this Post
