Boosaaso(RBC Radio) Musharaxa u taagan jagada Madaxinimada dowladda Puntland Dr Axmed Maxamed Axmed Shirwac oo loo yaqaano Saadiq EENOW ayaa maanta soo gaaray magaaladda Boosaaso.
Musharax Dr Saadiq EENOW ayaa,waxaa garoonka kusoo dhaweeyey dadweyne isugu jiray waxgarad,Issimo,ganacsato ,haween iyo dhalinyaro kuwaas oo sitay Sawirka Murashaxa isla markaana lulayey caleemo qoyan.
Murashax Dr Saadiq EENOW oo Saxaafadda iyo dadweynihii soo dhaweeyey kula hadlay Garoonka diyaaradaha ee magaaladda Boosaaso ayaa ugu horeyn ka mahadceliyey soo dhaweynta loo sameeyey.
Wuxuuna xusay inuu doonayo in shacabka Puntland u dhiso dowlad cadaalad ah isla markaana u shaqeysa Ummadeeda.
….’’’ Waxaan idin wadaa bishaaro,waxaan idin wadaa rajo,waxaan idin wadaa guul,ilaahay idankii dowlad wanaagsan baan dhisaneynaa ,ilaahay idankiis waxaan dhisaneynaa maamul dadweynihiisu Jecelyihiin…..’’’’ayuu yiri Dr Saadiq EENOW.
Sidoo kale Dr Saadiq EENOW ayaa ka dhawaajiyey iney muhiim tahay si loo gaaro yoolka la higsano isku diibni laaga helo shacabka iyo Murashaxa,isagoona tilmaamay in haddii la doonayo in Madaxweyne cadaalad ah la helo marka horeba la keeno Xildhibaano bulshadiisa ka damqanaya.
…’’’Laakiin wax walba waxay ku xiranyihiin idinka saad u fahantaan dowladnimo,saad u doorataan Xildhibaano,saad u doorataan nin mas’uul idin ah oo idin matala,saad u badeshaan noloshaan qabiilka iyo beelaha ku dhisan,waa in inaga oo mid ah aan dooranaa xildhibaano sax iyaguna ay doortaan Madaxweyne mas’uul ah oo inaga naxaya…..’’’’ayuu yiri Dr Saadiq EENOW.
Musharax Dr Saadiq EENOW ayaa ahaa Guddoomiyihii Ururka MIDNIMO ee Puntland,waa nin qoraa ah isla markaana Taariikhyahan ah,sidoo kale,waxaa lagu tilmaamaa in uu yahay Faylasuuf aqoon fiican u leh diinta Islaamka ahna Muxaadir aan dhageysigiisa laga caajisin.
___________________
Cismaan Turaabi
Use Facebook to Comment on this Post
