Soomaalidu ma ka mid-baa Qowmiyadaha dalka Ethiopia.
Abshir Abdulaahi Mohamed
Xuutaa143@gmail.com
Diseembar 06 2013
Soomaaliya oo ah dal madax banaan oo xorida ka qaatey gumeystihii Ingiriiska iyo Talyaaniga sanadkii 19960-kii ayaa sanadihii ugu danbeeyey oo dalka uu ka jirey burbur islamarkaana tan iyo wixii ka danbeeyey markii ay dhacdey dowladii dhexe uusan dalku yeelan dowlad xoogan badan ayaa sida ka muuqata siyaasadiisa waxa ay ku dhex milantey dowladaha adduunka gaar ahaan kuwa deriska la,ah Somalia.
Sida ay qabaan dad badan oo Somalida ka mid ah marka loo eego siyaasada jahwareersan ee dalka ka jirtey 20 sano ee lasoo dhaafey waxay ku micnaynayaan in mar labaad uu dalku galay gumeysi daahsoon oo aysan jirin wali cid si rasmiya ugu dhawaaqdey oo ka mid ah dhinacyada siyaasada ee ka jira gudaha Somalia, balse nux nuxda shacabka Somaliyed ahayd mid ku salaysan xaqiijinta gumeysigaas.
Marka aynu is dul taagno xuska maalinta Qowmiyadaha ee Dalka Ethiopia oo magaalada Jig jiga ee xarunta maamulka Somalida Ethiopia ka qabsoomi doonta maalmaha soo aadan ayaa waxa durba ka bilowday dhinacyada siyaasada dalka Somalia wafuud kala mataleysa oo durba sii xaadirtey goobta lagu qabanayo.
Waxaana ka xusi karnaa wafuudaasi Dowlada federalka Somalia oo uu uga qeyb galayo wafti uu hogaaminayo Wasiirka Arrimaha Gudaha C/kariin Guuleed , Puntland oo ay uga qeyb galayaan wafti uu hogaaminayo Madaxweynaheeda iyo Somaliland oo wafti ka socda ay uga qeyb galayso .
Micnaha ku jira ka qeyb galitaanka dhinacyadaasi maalinta qowmiyadaha dalka Ethiopia waa arrin leh baraarugeeda sababta ka danbeysay, walow ay jirto wafuud ka socota dowladaha deriska la ah Ethiopia oo iyana kasoo qeyb galaya.
Balse uu ka bedelan yahay qaabka ay Somalidu uga qeyb galayso maalinta qowmiyadaha dalka Ethiopia,kuwaas oo sida laga arki karo dhinacyada siyaasada ee ka jira dalka Somalia ay uga qeyb galayaan hab ku saleysan in qolo kasta dhinaceeda dowlada Ethiopia ugu yeertey xuskan u gaarka ah .
Waxayna taasi ka dhigan tahay marka dhinac laga eego inay yihiin maamul hoosaadyo la mid ah kuwa ka jira dalka ethiopia tusaale ahaan sida maamulka Somalida Ethiopia ee jig jiga xarunta ay u tahay oo kale.
Ma ahan markii ugu horeysay oo ay ka qeyb galaan dhinacyada siyaasada Somalidu maalmaha xusaska ah ee u gaarka ah dowlada Ethiopia, iyada oo inta laga xasuusto taariikhdii burburka ee dalku ku jirey ay ugu yeeri jirtey Ethiopia marka ay jiraan xusas taariikhdeeda iyo dhaqamadeeda quseeya dhinacyo kala duwan oo ka socda maamulada iyo Dowladihii burburkii ka dib Somalidu soo doorteen.
Abshir Abdulaahi Mohamed
Xuutaa143@gmail.com
Garowe Puntland Somalia.
QORAAGA AYEY U GAAR TAHAY QORAALKAAN LOOMAMA FASIRAN KARO TAN RAXANREEB.COM CIDII RABTA IN AY SI GAAR AH MAQAAL AMA FIKRAD U SOO DIRTO RAXANREEB WAXAA LOOGU SOO HAGAAJIN KARTAA ADMIN@RAXANREEB.COM
Use Facebook to Comment on this Post
