Muqdisho[RBC Radio]Magaalada caasumada ah ee Muqdisho waxaa maantay ka dhoftay wafti ay hor-cayso ku-simaha wasiirka arrimaha dibadda Soomaaliya Fowsiyo Yuusuf Xaaji Aadan,waxana la sheegay safarkeeda inuu ku wajahan yahay dalka France gaar ahaana magaalada xarunta uu ah dalkaasi ee Paris.
Waxaa la sheegay in dalkaasi ay uga qeyb gali doonto shir madaxeedka waddamada Africa iyo France,waxana shirkaasi ka qeyb galaya sida la sheegay ugu yaraan 40 hogaamiye , waxana looga hadli doonna mudda uu socda arrimo ay ka mid yihiin xasilinta wadamada qalalaasaha ammaan xumo uu ka jiro oo ay ka mid yihiin Mali, Central African Republic iyo Soomaaliya , waxaana shir gudoomin doona madaxweynaha Faransiiska Francois Hollande.
Arrimaha kale ee shirka lugu soo qaadi doonna oo wax la iska weydiin doonna waxaa ka mid ah la dagaalanka argagaxisada ,burcad badeeda , dhaqaalaha ,horumarinta iyo isbadalka cimilada , waxana dhanka Soomaaliya la xaqiijiyey inay muujin doontaa baahida ay u qabto in laga taageero tayeynta iyo qalabeynta ciidamada milatariga iyo kuwa badda ,taasoo ay barbar socoto codsiga taageero howlgalo amni.
Sidoo kale Fawsiyo waxaa la sheegay mudda uu shirka socda inay sidii kale kulamo gaar gaar ah la yeelato madaxda lagu casuumay furitaanka shirkaasi oo socon doona maalmaha Jimcaha iyo Sabtida .
Shirkii kand ka horreyey ee ahaa kii 25-aad ee dowladaha Africa iyo France oo lagu qabtay Magaalada Nice 31 May -1 June 2010 ayaa waxaa Soomaaliya uga qeybgalay madaxweynihii hore ee KMG Sharif Sheikh Ahmed.
____
RBC Radio
Use Facebook to Comment on this Post
