Muqdisho(RBC Radio) Gudoomiyaha maxkamadda sare ee dalka Mudane Caydiid Ilka Xanaf ayaa ka hadlay dilalka qorshaysan ee loo gaysanayo howl-wadeenada garsoorka dalka, wuxuuna sheegay inaysan taasi hakin doonin howsha ay Bulshada Soomaaliyeed u hayso Hay’adda garsoorka qaranka.
Caydiid Ilka Xanaf gudoomiyaha maxkamadda sare ee dalka ayaa sheegay in kooxo haraadi ah oo ka haray ururka Alshabaab ay gaystaan dilalka qorshaysan ee lala beegsado masuuliyiinta Hay’adda Garsoonka, wuxuuna ka dhawaajiyay in Hay’adda Garsoorka aysan taasi ka joojin doonin howsha ay shacabka Soomaaliyeed u hayaan.
Wuxuu tilmaamay gudoomiyuhu in kooxaha ka tirsan Alshabaab ee dilalka ka gaysta magaalada Muqdisho ay gumaad ku hayaan Bulshada Soomaaliyeed, wuxuuna ka codsaday shacabka Soomaaliyeed inay la shaqeeyaan ciidamada ammaanka si looga qabto kooxahaas waxyeelada u gaysanaya shacabka Soomaaliyeed.
“isku dayga ay samaynayaan kooxaha Argagixisada ah ee Alshabaab oo ay ku doonayaan inay ku dhibaateeyaan Garsoorayaasha dalka waxba kama bedeli doono shaqada garsoorasaashu ay u hayaan dalka, ayuu yiri gudoomiyaha maxkamadda sare ee dalka Caydiid Ilka Xanaf.
Magaalada Muqdisho ee caasimadda Soomaaliya ayaa waxaa mar kasta ka dhacay dilal kala duwan waxaana badankooda sheegta inay ka dambeeyeen ururka Alshabaab.
RBC Radio
Xafiiska Muqdisho
Use Facebook to Comment on this Post
