Baydhabo(RBC Radio) Wararka ka imaanaya deegaanno ka tirsan gobolka Baay ayaa sheegay in saakay ay halkaas howlgallo ka bilaabeen ciidamadda xoogga dalka Soomaaliya iyo kuwa Ethiopia,gudoomiyaha degmada Owdiinle Maxamed Cabdi ayaa sheegay in ururka Alshabaab ay kala wareegeen tuulooyin badan oo hoos yimaada degmada Owdiinle ee gobolka Baay.
Gudoomiyaha degmada Owdiinle Maxamed Cabdi oo waraysi gaar ah siiyay warbaahinta dowladda ayaa sheegay in ciidamada qalabka sida ee dowladda federaalka Soomaaliya oo kaashanaya ciidamada Ethiopia ay saakay tuulooyin badan oo hoos yimaada degmada Owdiinle ay ka sameeyeen howlgallo lagu xoreeynayo deegaanadaas.
Maxamed Cabdi ayaa tibaaxay in ciidamada qalabka sida ee dowladda federaalka Soomaaliya iyo kuwa Ethiopia ay saakay ururka Alshabaab kala wareegeen tuulooyin gaaraya 33 tuulo oo ay hore gacanta ugu hayeen ururka Alshabaab.
Wuxuu sheegay gudoomiyaha degmada Owdiinle in dadka ay saakay ka xoreeyeen ururka Alshabaab aysan muddo afar sano ah arkin macaanka ay leedahay dowladnimada, wuxuuna xusay inay si aad ah ugu baahnaayeen inay u yimaadaan ciidamada qalabka sida ee dowladda federaalka Soomaaliya.
Gudoomiyaha degmada Owdiinle Maxamed Cabdi ayaa dhanka kale sheegay in shacabka ku nool deegaanada ay gacanta ku dhigeen ay u baahan yihiin in lala soo gaaro gargaar deg dega si looga samatabxiyo dhibaatada ay gaarsiiyeen Alshabaab, oo deegaanadaas ka mamnuucay inay yimaadaan Hay’adaha gargaarka.
Ma jirto cid kale oo ka madaxbanaan oo xaqiijinaysa warka kasoo baxay gudoomiyaha degmada Owdiinle ee gobolka Baay.
RBC Radio
Xafiiska Muqdisho
Use Facebook to Comment on this Post
