Muqdisho(RBC Radio) Waxaa si rasmi ah iminka uga furmay xarunta Golaha shacabka ee magaalada Muqdisho kulankii Baarlamaanka federaalka Soomaaliya ee looga hadlayay mooshinka laga soo gudbiyay xukuumadda uu hogaamiyo R/wasaare Cabdi Faarax Shiirdoon Saacid.
Xildhibaanada Baarlamaanka federaalka Soomaaliya ayaa la filayaa inay dood kulul ka yeeshaan mooshinka laga soo gudbiyay R/wasaaraha xkuumadda federaalka Soomaaliya Mudane Cabdi Faarax Shiirdoon Saacid, waxaa xarunta Golaha shacabka ku sugan Xildhibaanada mooshinka kasoo gudbiyay R/wasaare Saacid iyo Mudanayaasha kasoo hor jeeda mooshinkaas.
Waxaa daqiiqado ka hor la dhaariyay xogaynta Baarlamaanka Soomaaliya oo lagula dardaarmay inay si daacad ah u gotaan waajibaadka loo igmaday, gudoomiyaha Baarlamaanka Soomaaliya MUdane Maxamed Sheekh Cisaan Jawaare ayaa kula dardaarmay howlwadeenada Baarlamaanka Soomaaliya inay codadka u tiriyaan si daacad ah.
Gudoomiyaha Baarlamaanka Soomaaliya Mudane Maxamed Sheekh Cismaan Jawaare ayaa khudbad dheer u jeediyay kulanka Xildhibaanada Baarlamaanka Soomaaliya xiligan uga socda magaalada Muqdisho, wuxuna kala hadlay arimo ay ka mid ayaaheen mooshika laga keenay R/wasaare Saacid, gudoomiyaha ayaa Xildhibaanada ka codsaday inay ilaaliyaan nadaamka Baarlamaanka Soomaaliya.
Dhanka kale waxaa iminka la tirinayaa Xildhibaanadii mooshinka kasoo gudbiyay R/wasaaraha xukuumadda federaalka Soomaaliya Mudane Cabdi Faarax Shiirdoon Saacid.
Wixii warar ah ee kasoo kordha kulanka Baarlamaanka Soomaaliya dib ayaan idin kala socodsiin doonaa
RBC Radio
Xafiiska Muqdisho
Use Facebook to Comment on this Post
