Gaalkacyo[RBC Radio]Shirkan oo ay isugu yimaadeen nabadoonno gaaraya lixdan nabadoon kana kala socda beelaha Daarood,Meheri iyo Madhibaan ayaa looga gol lahaa turxaan bixin iyo musaalaxo la dhex dhigo beelaha gobolka Mudug, iyadoo sidoo kalana looga hadlay qodobo kale oo ay ka mid yihiin xaalufka deegaanka iyo nabaad guurka, caawinta dadkii musiibada ay ku habsatay, wadista amniga iyo ka qayb qaadashada hormarka aasaasigaa.
Shirkani waxaa sidoo kale goobjoog ka ahaa maamulka gobolka Mudug iyo kan degmada Gaalkacyo, wuxuuna daba socday kulamo hore oo lagu qabtay degmada Galdogob looguna magac daray nabaadiino 2.
Marka laga soo tago shirkan waxaa jira shirar kale oo loo balamay in la isugu soo noqdo bilowga sanadka cusub ee 2014.
Shirkan muhiimka u ah bulshada deegaanka ka qayb galayaasha ayaa iswaydaarsaday doodo iyo xogo ku saabsan sida looga wada qayb qaadan karo ka hor tagga khilaafaadyada duuggan oo aan wali qarxin ee u dhexeeya beelaha gobolkani, kuwaasoo horay loo galay laakiin aan la dhamaystirin xalintooda.
Ugu horayn waxaa shirka daahfuray oo qodobada shirka goobta ka akhriyay nabadoon Cumar C/dulle (Dheere), isagoo qodobada shirka u kala qaaday laba qaybood.
1- Amniga iyo sida ugu habboon ee looga wada hortagi karo wax walboo dhalin kara inay kacaan khilaafaadyada aasan ee aan wali qarxin, taasoo laga hadlay maalintii 1aad ee Shirka.
2- Deegaanka iyo gargaar ka qayb qaadashada walaalaha ku cayrtoobay roobabkii dabayalaha watay ee ku dhuftay deegaanno ka mida Puntland.
Kulankani waxaa si wada jira u daadihinayay agaasimaha hay’adda Horn African Center for Peace Suldaan C/salaan Suldaan Maxamuud iyo gudoomiye ku xigeenka gobolka Mudug Axmed Muuse Nuur.
Ugu danbeyn kulankani waxaa ka soo baxay qodobbo dhawr ah, kuwaas oo kala ah.
1- In horay loo wado wada-hadalada nabadeed ee khilaafaadyada taagan ee beelaha gobolka.
2- In la coodo oo loo xoolo gooyo walaalaha cayroobay ee deegaanada Puntland qaarkood.
3- In magaha la qaaliyeeyay loo celiyo waxa ay ka qabto diinta Islaamka.
4- In laga hortago xaalufka deegaanka iyo oodashada dhulka noolaha ka dhexeeya, taasoo xoolaha ka xayiraysa daaqqa.
_______
Iimaan Maxamed Jaamac
Deegaan1994@gmail.com
RBC Radio
Use Facebook to Comment on this Post
