Beledweyne(RBC Radio) Afhayeenka dhanka howlgalada u qaabilsan Alshabaab Sheekh Cabdi Casiis Abuu Muscab ayaa ka hadlay ciidamada iskaashanaya ee ka dhowaan kasoo baxay magaalada Beledweyne, kuwaas oo ku wajahan deegaanada ay Alshabaab kaga sugan yihiin gobolka Hiiraan, iyagoo doonaya inay Alshabaab ka saaraan deegaanadaas.
Afhayeenka dhanka howgallada u qaabilsan Alshabaab Sheekh Cabdi Casiis Abuu Muscab ayaa sheegay in ciidamada Alshabaab ay taasi fursad u tahay, wuxuuna tilmaamay inay weeraro dhiig badani ku daato ay u gaysa doonaan ciidamada dalka Jabuuti ee qaybta ka ah howlgalka AMISOM.
Shekh Cabdi Casiis Abuu Muscab ayaa ka dhawaajiyay in Alshabaab ay hadda u fududaan doonto inay meel kasta ku beedsadaan ciidamada dalka Jabuuti, wuxuuna ku goodiyay inay gumaadi doonaan ciidamada ka socda dowladda Jabuuti ee Hiil-walaal.
Afhayeenka ayaa dhanka kale ka hadlay weeraro ay Alshabaab ku qaadeen gudaha magaalada Beledweyne ee xarunta gobolka Hiiraan, wuxuuna sheegay in soo bixitaanka ciidamada Jabuuti ay sababtay weeraro badan oo ay Alshabaab ka fuliyeen magaalada Beledweyne sida uu hadalka u dhigay.
Sheekh Cabdi Casiis Abuu Muscab ayaa sheegay in weeraradaas ay ka fuliyeen magaalada Beledweyne ay ku dileen tiro ka tirsan ciidamada Jabuuti,Ethiopia iyo kuwa dowladda federaalka Soomaaliya, wuxuna ku nuuxnuuxsaday inay sii wadi doonaan weerarada ay ka fulinayaan gudaha magaalada Beledweyne.
Ciidamada AMISOM ee ku sugan magaalada Beledweyne ee xarunta gobolka Hiiraan ayaa howlgallo ka bilaabay deegaanno ka tirsan gobolka Hiiraan, waxayna wacad ku mareen inay Alshabaab ka safayn doonaan gobolka Hiiraan.
RBC Radio
Xafiiska Muqdisho
Use Facebook to Comment on this Post
