Muqdisho(RBC Radio) Mudanayaasha Baarlamaanka Soomaaliya ayaa maanta loo qaybiyay qoraal la xiriira mooshinka laga keenay R/wasaaraha xukuumadda Soomaaliya, waxaana maanta kulanka shir gudoominayay gudoomiyaha Baarlamaanka Soomaaliya Maxamed Sheekh Cismaan Jawaare, waxaana goob joog ka ahaa labadiisa ku xigeen.
Gudoomiyaha Baarlamaanka Soomaaliya mudane Maxamed Sheekh Cismaan Jawaari oo ka hadlay furitaanka kulanka ayaa sheegay in Xildhibaanno gaaraya 168 Mudane ay u soo gudbiyeen gudoonka Baarlamaanka mooshin ka dhan ah R/wasaare Saacid, wuxuuna tilmaamay in sidaas owgeed ay maanta ugu qaybiyeen Xildhibaanada Baarlamaanka mooshinka laga keenay xukuumadda.
Xildhibaanno ka tirsan Baarlamaanka Soomaaliya oo ka hadlay kulanka maanta ayaa dalbaday in Xildhibaanada mooshinka ka keenay R/wasaare Saacid lagu soo qoro magacyadooda, waxaa sidoo kale kulanka ka hadlay Xildhibaanno kale waxayna sheegeen in magacyada Xildhibaanada lagu soo lifaaqi doono marka uu bilowdo ka dooditaanka mooshinka R/wasaare Saacid sidaasna uu qabo xeer hoosaadka Baarlamaanka Soomaaliya.
Gudoomiyaha Baarlamaanka Soomaaliya Mudane Maxamed Sheekh Cismaan Jawaare oo ka hadlay kulanka dhamaadkiisa ayaa sheegay in Xildhibaanada Baarlamaanka Soomaaliya loo qaybiyay mooshinka laga keenay R/wasaaraha xukuumadda Soomaaliya Mudane C/faarax Shiirdoon Saacid.
Afhayeenka Baarlamaanka Soomaaliya ayaa tilmaamay in Shan cisho ka dib uu bilaaban doono ka dooditaanka mooshinka laga keenay R/wasaaraha xukuumadda federaalka Soomaaliya Mudane Cabdi Faarax Shiirdoon Saacid.
Xildhibaanno gaaraya 168 Mudane ayaa mooshinka kala noqoshada codka kalsoonida ka keenay R/wasaaraha xukuumadda Soomaaliya Mudane Cabdi Faarax Shiirdoon Saacid, waxaana la wada dhoowrayaa halka uu ku dambeeyo R/wasaaraha Soomaaliya Mudane C/faarax Shiirdoon Saacid.
RBC Radi
Xafiiska Muqdisho
Use Facebook to Comment on this Post
