Xawaaladda Hodon Global Online oo Raashin Ku Wareejisay Guddiga Culimada ee Gacanta ku hayaTabarucaadka (Sawirro)

Raashinka ay Xawaalada Hodon Global Online ku wareejisay Culuma’udiinka

Boosaaso(RBC Radio) Waxaa maanta ay Xawaaladda Hodon Global Online ee Puntland ku wareejisay Guddiga Culuma’udiinka ee gacanta ku haya Tabarucaadka loo fidinaayo dadka waxyeeladu kasoo gaartay duufaantii ku dhufatay deegaanada qaar deeq raashin ah oo ay ugu talagashay dadkaas.

Xawaaladda Hodob Global Online ayaa deeqdan oo ka kooban Bur iyo Bariis si rasmi ah ugu wareejisay Guddiga Culuma’udiinka ah ee Tabarucaadka kawada magaaladda Boosaaso,wuxuuna guddigu ka gudoomay deeqdaas iyagoona ballanqaaday in sidii loogu talagay ugu gudbin doonaan deeqdaas.

Maxamed Shiikh Ismaaciil

Maamulaha Hodon Golobal Online ee Puntland Maxamed Shiikh Ismaaciil oo Saxaafadda la hadlay ayaa sheegay in raashinkaas oo isugu jira bur iyo bariis uu ka koobanyahay 190-kiish ayna Xawaaladu ugu deeqday dadka Walaalahood ah ee musiibadu soo gaartay.

…..’’’’’’Maahan markii ugu horeysay oo ay ka qeybqaataan dhacdooyinka noocan oo kale ah, Insha allaahu tacaalaa,waxaan leenahay dadkaas dhibaatadu ku dhacday oo Walaalaheen ah Ilaahay faraj kheyr qaba ha u furo,wax gacan bini’aadam bixisay wax ka weyn bey u baahanyihiin….’’’’ayuu yiri.

Guddoomiyaha Guud ee Mu’asasada AL- Minhaaj Maxamed Maxauud Ciise

Guddoomiyaha Guud ee Mu‘asasada AL- Minhaaj Maxamed Maxauud Ciise ayaa sheegay in Xawaaladda Hodon Global Online kala wareegeen raashin iyaga oo wakiil ka ah dadka dhibaatadu kasoo gaartay duufaanta ku dhufatay deegaanada qaar ee Puntland,wuxuuna ugu duceeyey Xawaaladda doorka ay qaadaneyso gurmadka dadkaas loo fidinaayo.

….’’Hodan Global Online waxaan leenahay ilaahay haku hodmiyo,hodon ilaahay haka dhigo,waxaana leenahay ilaahay Subxaanahu watacaalaa waad hodmeysaan annaguna waan idin duceyneynaa,inta ay gaari doontaana wey idin duceyneysaa…..’’ayuu yiri

Shiikh Axmed Daahir oo ka gudoomay Xawaaladda Raashinka

Shiikh Axmed Daahir ayaa ballanqaaday in deeqda raashinka ah sidii loogu talagalay ugu gudbin doonaan dadkii dhibaatadu kasoo gaartay duufaanta,wuxuuna walaalaha kale ee Islaamka ah ugu baaqay iney ka qeybqaataan gurmadka loogu jiro caawinta dadkaas.

…’’Annaguna waxaan u gudbineynaa dadkii tabaaleysnaa oo roobku waxyeeleeyeen oo imtixaanku ku dhacay,marka waxaan leenahay walaalaha kale oo Islaamka ah intii hore oo wax bixisay maahane inta kalena iney ku deydaan haddii loo gurmado walaalahaas dhibaatadas lala qeybsado meel fiican beynu ka gaareynaa…’’’ayuu yiri.

Si kastaba deeqda raashinka ah ee ay Xawaaladda Hodon Global Online ku wareejisay Culuma’udiinka ayaa qeyb ka ah Tabarucaadka loo uruurinayo dadka waxyeelada ba’an kasoo gaartay duufaanta ku dhufatay qaar kamid ah deegaanada Puntland.