Boosaaso(RBC Radio) Musharaxa xilka Madaxtinimada Puntland ee doorashada soo socota bisha Janaayo Dr Cali Xaaji Warsame ayaa kulan la qaatay qado ah qaar kamid ah bulshada magaaladda Boosaaso.
Kulanka oo lagu qabtay Hotel Bulsho ayaa,waxaa kasoo qeybgalay aqoonyahan,Issimo,nabadoono,haween iyo dhalinyaro,waxaana loogu muujiyey Taageero.
Bile Cabdullaahi Warsame oo ka sheekeeyey aqoonta durugsan uu u leeyahay Musharax Dr Cali Xaaji Warsame ayaa sheegay in Musharaxu yahay shakhsi aqoon leh isla markaana ka shaqeynaayey muddooyinkii ugu danbeeyey dalka.
Wuxuu sheegay in Musharax Cali Xaaji Warsame uu wato laba shahaado oo dhanka Maareeynta Maamulka iyo horumarinta iyo shahaadada CPA isla markaana uu soo noqday Hanti dhawrkii guud ee Dubai,Madaxii dekada Bosaso iyo Maareeyihii Golis Telecom.
Generaal Cali Ismaaciil oo ah shakhsi si weyn looga qadariyo Puntland ayaa sheegay in uu soo dhaweynayo Musharaxnimada Dr Cali Xaaji Warsame iyo kuwa kaleba balse looga baahanyahay Musharaxiinta iney ilaaliyaan ammaanka guud ee Puntland.
Generaal Cali Ismaaciil
Musharax Dr Cali Xaaji Warsame oo hadalka qaatay ayaa ugu horeyn u mahadceliyey dadkii kasoo qeybgalay kulankiisa,wuxuuna sheegay in wax badan qabteen Maamuladii isaga danbeeyey Puntland balse uu doonayo in uu wax ka qabto inta dhiman.
Wuxuu sheegay in haddii loo baahanyahay iney dhacdo doorasho xalaal la doonayo in la isu keeno Issimada Puntland taas hadey dhici weydana ay doorkoodii gabayaan.
….’’’Waxaa loo baahanyahay iney isu yimaadaan Issimada Puntland hadey isu imaan waayaan oo gogol dhigi waayaan oo doorkooda qaadan waayaan Taariikhdey geli doonaan,waxaana ugu yeerayaa si degdeg ah..’’’’ayuu yiri Musharax Cali Xaaji Warsame.
Musharax Cali Xaaji Warsame
Dr Cali Xaaji Warsame ayaa soo dhaweeyey Guddigii dhawaan lagaga dhawaaqay Shirweynihii gobolada Bari iyo Sanaag Bari ee lagu qabtay isu imaatinkooda Ergo ka kala socotay goboladaas magaaladda Boosaaso ee xarunta gobolka Bari.
Sidoo kale,Dr Cali Xaaji ayaa ballanqaaday in haddii uu xilkaas ku guuleysto uu ka shaqeyn doono Midnimada Puntland iyo soo celinta gobolada Maqan ee Puntland.
Dhanka kale,Musharax Cali ayaa ka hor yimid Guddiga amniga xiliga doorashooyinka ee dhawaan uu sameeyey Madaxweyne Faroole,wuxuuna sheegay inuusan xaq u lahayn in Guddigaas uu kaligiis magacaabo maadaama qudhiisuba uu Musharax yahay.
Gabagabadii ayuu Tacsi u diraya Musharax Cali Xaaji Warsame dadkii ay waxyeeladu kasoo gaartay roobabkii iyo duufaantii ku dhufatay deegaanada Puntland qaar kamid ah,isagoona EEBE uga baryey in dhibaatadaas uu ka dulqaado.
Aqoonyahan,Waxgarad iyo qaar kamid ah qeybaha bulshada oo ka hadlay madashaya ayaa si weyn usoo dhaweeyey Musharaxnimada Dr Cali Xaaji Warsame ee Puntland.
Si kastaba Musharax Cali Xaaji Warsame oo Todobaadkan bilowgiisii soo gaaray Boosaaso ayaa wada Ololihiisii ugu ballaarnaa,wuxuuna booqday goobaha Waxbarashada ee kuyaala Boosaaso.
_____________________
Cismaan Turaabi
RBC Radio
turrabi30@gmail.com
Use Facebook to Comment on this Post
