Muqdisho(RBC Radio) Safiirka dowladda Soomaaliya u fadhiya magaalada Nairobi ee caasimadda dalka Kenya Maxamed Cali Nuur Ameerika ayaa dadaal ugu jira sidii uu shacabka dalka Kenya uga dhaadhicin lahaa in dadka Soomaaliyeed aysan wax lug ah ku lahayn weerarka Al-shabaab ay ka wadaan Westgate.
Maxamed Cali Nuur ayaa si toos ah shacabka dalka Kenya ugala hadlay in ka badan 6 Telefishin oo ku yaal dalkaas ayaa u sheegay bulshada reer Kenya in waxa ka socda Westgate ay yihiin falal argagixiso oo aysan masuuliyadeeda lahayn dadka Soomaaliyeed,wuxuuna beeniyey warar been abuur ah oo la faafiyey kuwaas oo sheegaya in kooxda haysata Westgate ay sii deynayaan Soomaalida iyo dadka Muslimiinta ah.
Ameerika ayaa war aan sal lahayn ku tilmaamay in Al-shabaab ay u kala aabbayeelayaan dadka u afduuban,wuxuuna tusaale usoo qaatay wiilkii Soomaaliyeed ee ka mid noqday dadkii ugu horeeyey ee ay kooxdani toogteen iyo gumaadka ay Al-shabaab ka geystaan magaalada Muqdisho ee caasimadda Soomaaliya oo uu sheegay in dadka ku nooli ay dhammaantood muslimiin yihiin.
Safiirka ayaa tilmaamay in shacabka labada dal ay yihiin walaalo isla markaane ay ka xun yihiin waxa ka socda westgate,Madaxweynaha dalka Kenya Uhuru Kenyatta oo la weydiiyey waxa uu weerarkani ka bedelayo xiriirka kala dhexeeya Soomaaliya ayaa caddeeyey in xiriirka labada dal uusan waxba u dhimayn weerarka Al-shabaab ay ku qabsadeen Suuqa Westgate ee magaalada Nairobi,wuxuuna meesha ka saaray iney meelmariyaan dalabka Al-shabaab ee ah iney ciidankooda kala baxaan Soomaaliya.
Danjiraha Soomaaliya ee dalka Kenya Maxamed Cali Nuur Ameerika ayaa ugu baaqay bulshada Soomaaliyeed ee ku dhaqan dalkaas iney isdajiyaan,Booliska Kenya ayaa looga bartay marka ay qaraxyadu ka dhacaan dalkaas iney bartilmaameedsadaan dadka Soomaaliyeed.
RBC Radio
Use Facebook to Comment on this Post
