Muqdisho (RBC) Ururka Al Shabaab ayaa markii saddexaad hawada soo geliyey bar cusub oo ay ku yeesheen bogga twitter-ka ka dib markii laga xanibay dhowaan boggii hore ay u lahaayeen.
Boggan cusub ee Al Shabaab HSM_PRESS oo rasmi ah hawada loo geliyey 9-kii bishan ayaa waxaa lagu bilaabay ereyo ay ku muujinayaan sida ay Al Shabaab uga xun tahay xiritaankii bartoodii hore.
Isla bartan cusub Al Shabaab waxay markiiba ku sheegatay weeraro ay sheegeen inay ka fuliyeen magaalooyinka Muqdisho iyo Qooqaani. Waxay kaloo ku cambaareeyeen fashilka ku dhacay maamulka madaxweyne Obama ee Mareykanka ee ku dhacay weerarkii lagu qorsheynayey in lagu qaado Suuriya.
Al Shabaab ayaa sanadkii 2012 markii ugu horreysay ku biirtay barta twitter-ka waxaana bartaasi laga xiray bishii Janaayo 2013 ka dib markii ay soo geliyeen boggan sawirro askari Faransiis ah oo ay ku dileen hawlgal guuldarreystay oo ciidamada Faransiisku ka fuliyeen degmada Buulo Mareer ee gobolka Shabeelaha Hoose.
Waxay markale furtaan bar kale oo shaqeyneysay ku dhowaad siddeed bilood taasoo iyana laga xiray bishan horraanteedii xilli ay soo geliyeen weeraro ay sheegteen masuuliyadooda oo ay ku qaadeen goobo dalka ka mid ah.
Dadka yaqaana kooxaha Al Qaacida iyo Al Shabaab ayaa qaba in had iyo jeer ay caadi tahay in kooxahan laga xanibo bogaga internetka ay ku leeyihiin hase yeeshee iyaguna markasta baro cusub ay furtaan.
RBC Radio
Use Facebook to Comment on this Post
