Mandheera(RBC Radio) Wararka ka imaanaya magaalada Mandheera ee gobolka Waqooyi bari ee wadanka Kenya ayaa ku waramaya in halkaas xalay lagu dilay askari ka tirsan booliska wadanka Kenya,askariga yaa dhintay kadib markii ay ku qarxeen waxyaabaha qarxa oo la sheegay in lagu sii diyaariyey wadada dhinaceeda taasoo qaraxday markii uu askariga geeriyooday ku dul istaagay.
Qaraxa ayaa dhacay xili ay ciidamada booliska magaalada Mandheera ay ku jireen Roondo ay ku sugayeen amniga magaaladaas oo xiliyada qaar ay ka dhacaan qaraxyo ,geerida askariga ayaa waxaa xaqiijiyey taliyaha ciidamada booliska wadanka Kenya ee gobolka waqooyi bari Charlaton Murithi.
Taliyaha gobolka waqooyi bari ee ciidamada booliska Kenya Charlaton ayaa u sheegay wargeyska The Standard ee kasoo baxa magaalada Nairobi ee caasimada wadanka Kenya in askarigu uu geeriyooday kadib markii ay kun qarxeen walxaha qarxa oo la dhigay wadada dhinaceeda,wuxuuna intaa ku daray in ciidanka boolisku ay wadaan baaritaano ay ku ogaanayaan cidii ka danbeysay qaraxaas.
Magaalada Mandheera iyo magaalooyinka kale ee gobolka waqooyi bari ee Soomaalidu dagto ee wadanka Kenya ayaa muddooyinkii danbe marti u noqday qaraxyo iyo weeraro loo geysanayo ciidamada booliska Kenya,waxaana lagu eedeeyaan iney masuul ka yihiin dagaalamayaasha alshabaab oo dagaal kula jira ciidamada Kenya ee gudaha usoo galay dalka Soomaaliya.
RBC Radio
Xafiiiska Wararka Muqdisho
Use Facebook to Comment on this Post
