Muqdisho{RBC Radio} Wasiirka wasaaradda Gaashaandhigga xukuumadda federaalka Soomaaliya C/xakiin Xaaji Maxamuud Fiqi iyo wafti uu hogaaminayo ayaa maanta u ababaxay dalka Jabuuti,wasiirka Gaashaandhigga ayaa inta uusan ka duulin garoonka diyaaradaha magaalada Muqdisho ee Aadan Cadde wuxuu warbaahinta uga warbixiyey safarkiisa.
C/xakiin Xaaji Maxamuud Fiqi ayaa sheegay in safarkiisu uu ku wajahan yahay dalka Jabuuti halkaas oo uu kulamo kula qaadan doono madaxda dalkaas,wuxuuna sheegay inuu masuuliyiinta wadankaas kala hadli doono xiriirkla labada dal iyo sidii dowladda Jabuuti ay usii wadi lahayd taageerada ay siiso Soomaaliya.
Wasiirka Gaashaandhigga xukuuadda federaalka Soomaaliya C/xakiin Xaaji Maxamuud Fiqi ayaa sheegay in Jabuuti uu yahay dal ay walaalo yihiin Soomaaliya isla markaane uu kala dhexeeyo cilaaqaad soo jireen ah,wuxuuna xusay iney Jabuuti u tagayaan sidii ay ugala hadli lahaayeen iskaashiga amniga iyo Milateriga labada dal ,wasiirka ayaa intaa raaciyey iney madaxda dalkaas uga mahad celinayaan taageerada harag la’aaneed ee ay la garab taagan yihiin walaalahooda Soomaaliyeed gaar ahaan hawlaha baaxadda leh ee ciidanka Jabuuti ee hiil walaal ay ka wadaan gobolka Hiiraan.
C/xakiin Maxamuud Xaaji Fiqi ayaa tilmaamay iney dalka Jabuuti uga sii horeeyaan wafti kale oo uu hogaaminayo R/wasaare Cabdi Faarax Shiirdoon Saacid oo sida uu sheegay saakay gaaray dalkaas,wuxuuna tilmaamay iney muddo dhowr cisho ah booqasho ku joogayaan wadanka Jabuuti.
Fiqi ayaa dhanka kale sheegay in marka ay soo gabagabeeyaan safarka ay ku tagayaan dalka Jabuuti in waftigoogu u ambabixi doono wadanka Yaman,wuxuuna sheegay iney kala hadli doonaan dhibaatada dalkaas ku haysata Qaxootiga Soomaaliyeed,sidii la iskaga kaashan lahaa amniga,isagoona intaa ku daray iney dowladda Yaman sigaara uga codsan doonaan dib u dhiska iyo xoojinta ciidanka qalabka sida ee Soomaaliya.
RBC Radio
Xafiiska Muqdisho
Use Facebook to Comment on this Post
