Galgaduud{RBC Radio} Abaanduulaha ciidamada xoogga dalka Soomaaliya Gen. Cabdirisaaq Khaliif Cilmi oo uu la socday guddoomiyaha cusub ee loo magacaabay gobolka Galgaduud Xuseen Cali Wehliye Cirfo iyo Saraakiil kale ayaa gaaray degmada Caabudwaaq ee gobolka Galgaduud.
Maamulka gacanta ku hayo degmada Caabudwaaq ayaa si wanaagsan ugu soo dhoweeyay gudaha magaalada Caabudwaaq, waxayna abaanduulaha ku wareejiyeen ciidamadii degmada iyo qalabkii ay ku shaqayn jireen.
Cabdirisaaq Khaliif Cilmi abaanduulaha ciidamada xoogga dalka ayaa hadal ka jeediyay munaasabadii soo dhoweynta ahayd ee loo sameeyey, wuxuuna tilmaamay in ay talaabadan ciidamada iyo qalabka kale loogu wareejiyay ay ka mid tahay heshiis ay hore u kala saxeexdeen dowladda Soomaaliya iyo maamulka ahlu sunna.
Guddoomiyaha cusub ee gobolka Galgaduud Xuseen Cali Wehliye Cirfo ayaa isna xusay in xaaladda amni ee gobolka galgaduud ay wanaagsaantahay, wuxuuna baaq u diray Hay’adaha caalamiga ah in ay gacan ka gaystaan sidii loo heli lahaa adeegyada Bulshada ku nool degmooyinka gobolka Galgaduud.
Guddoomiyaha cusub ee gobolka Galgaduud iyo abaanduulaha ciidanka xoogga dalka Soomaaliyeed oo dhawaan gaaray gobolkaas ayaa ku hawlan sidii ay dib ugu soo nooleyn lahaayeen xaruntii 21aad ee ciidamada xoogga dalka.
RBC Radio
Xafiiska Muqdisho
Use Facebook to Comment on this Post
