Garoowe (RBC RADIO) Xildhibaan Aaadan Xaaji Xuseen oo ka tirsan Golaha Wakiilada Puntland ayaa shir saxaafadeed uu ku qabtay Magaalada Garoowe wuxuu sheegay in uu soo dhaweynayo sida Magaalada Taleex loogu soo dhaweeyey Madaxweyne ku xigeenka Puntland Generaal C/Samad cali Shire isagoo booqasho taariikhi ah ku tilmaamay kormeerka Madaxweynaha ayna tahay mid taageero mudan,wuxuuse Xildhibaanku codsaday in Madaxweyne ku xigeenku uu ka qayb qaato xoraynta Magaalada Laascaanood oo hada gacanta ugu jirta Maamulka S-Land.
“ Taleex waxaa ka socda Shir beeleed aan cidina lagu dhibayn dhalinyarada kasoo kicitimay Boocame ee Taleex weerarka ku ah waxaan leeyahay ka qayb qaata himilada lagu soo celinayo Dhulka ka maqan Puntland ma doonayno dhiig daata ma doonayno dagaal sokeeye waxaan rabnaa inaan xorayno dad mudo gacanta lagu haystay yeynaan inaga is khilaafin hiil iyo hoona waan la garab taagan nahay, sidaana waxaa yiri Xildhibaan Aadan.
Xildhibaanku wuxuu tilmaamay xiligan in aysan ku haboonayn in dagaal ahli ah uu ka dhex dhasho beesha Dhulbahante sida uu hadalka u dhigay isagoo ku baaqay in loo midoobo dib usoo celinta Deegaanada maqan tagista Madaxweyne ku xigeenka Puntland ee Degmada taleex ayuu sheegay in ay ka xun yihiin dad badan oo siyaasiyiin ah kuwaasi oo uu ku tilmaamay kuwo aan dan u hayn Beesha dantoodana ka hormariyay Tii caamka ahayd wuxuuna booriyay ka shaqaynta nabada iyo sugida Amniga.
Hadalkan Xildhibaanka ayaa imaanaya iyadoo Ciidan aan la ogayn cida ay ka amar qaataan ay isku aruursanayaan Deegaanka Boocame lana sheegay in ay ku wajahan yihiin Magaalada Taleex oo uu ku sugan yahay Madaxweyne ku xigeenka Puntland oo Halkaasi hawlo shaqo iyo shirarba u jooga.
RBC RADIO.
Xafiiska Wararka Garoowe.
Use Facebook to Comment on this Post
