SH/hoose{RBC Radio} Masuuliyiinta ka socota dowladda federaalka Soomaaliya ee gaaray deegaanka Lambar 50 ee gobolka SHabeelaha hoose ayaa ka kooban masuuliyiin ka tirsan wasaaradaha Gaashaandhigga iyo arimaha gudaha,saraakiil ciidan iyo xildhibaano,masuuliyiinta ayaa wada hadallo halkaa kula leh masuuliyiinta maamulka iyo waxgaradka deegaanka.
Waftiga dowladda oo gaaray gobolkaasi SHabeelaha hoose xalay habeenimadii ayaa waxa ay sheegayaa wararka aan ka heleyno deegaanka Lambar 50 iney halkaa u tageen sidii ay u qaadi lahaayeen Isbaarooyin yaalla deegaankaas kuwaas oo ay dhigteen Maleyshiyaad qaab qabiil u abaabulan xiriirne la leh maamulka deegaankaas.
Warar lagu kalsoon yahay oo aan ka heleyno deegaanka Lambar 50 ayaa sheegaya in maamulka deegaankaas uu ku gacan sayray tallaabada ay waftiga gaaray halkaa ku doonayeen iney ku qaadaan Isbaarooyinka yaalla deegaankaas kadibne ay goobahaas ku wareejiyaan ciidamada Milateriga dowladda Soomaaliya.
Kulankii labada dhinac ayaa waxaa hareeyey muran iyo buuq ka dhashay is fahan waa ku saabsan qaadista Jidgooyooyinka u yaalla ciidamo u abaabulan Maleyshiyo beeleed oo hoostaga masuuliyiinta maamulka deegaankaas,ma jirto cid ka tirsan labada dhinac oo wax faah faahin ah ka bixisay khilaafka la sheegayo inuu ka dhashay qaabka loo qaadayo Isbaarooyinka daadsandeegaankaas oo ay dhibaato fara badan ku qabeen shacabka ku nool Shabeelaha hoose iyo kuwa ku safra wadada Xiriirisa gobolada Banaadir iyo Baay.
Waftiga ayaa la sheegayaa iney xalay goor danbe gaareen magaalada Marka ee xarunta gobolka Shabeelaha hoose sida uu xaqiijiyey gudoomiyaha magaaladaasi Maxamed Cismaan Yariisow oo sheegay iney maanta kulamo la qaadanayaan waftiga ka socda dowladda ee gaaray gobolkaas.
Dowladda federaalka Soomaaliya ayaa ku hawlan hirgalinta amar kasoo baxay madaxweyanah dalka kaasoo gabi ahaanba lagu mamnuucay Isbaarooyinka,dowladda ayaa hore ugu guuleysatay iney Muqdisho ka nadiifiso Isbaarooyinkii yaallay waxayna xiligan u jeesatay gobolada kale ee dalka.
RBC Radio
Xafiiska Muqdisho
Use Facebook to Comment on this Post
