Mark a{RBC Radio} Ciidamada dowladda federaalka Soomaaliya oo kaashanaya ciidanka nabad ilaalinta Midowga Afrika ee AMISOM ayaa saaka hawlgallo ballaaran ka wada xaafadaha ay ka kooban tahay degmada Marka ee xarunta gobolka Shabeelaha hoose halkaas oo ay ka dhacayeen falal liddi ku ah amniga magaaladaasi.
Shacabka ku dhaqan magaalada Marka ayaa saaka kusoo toosay ciidamada dowladda Soomaaliya iyo kuwa AMISOM oo taagan dhammaan guryaha magaalada,waxaana gabi ahaanba xiran isu socodka Gaadiidka iyo ganacsiga guud ahaan magaalaa Marka ee xarunta gobolks SH/hoose.
Hawlgalka oo bilowday xalay saqdii dhexe ayaa ilaa xiligan ka socda xaafadaha ay ka kooban tahay magaalada Marka,ciidamada ayaa guri guri u galayaa xaafadaha,waxaana saaka hakad ku jiray gaadiidkii u kala gooshi jiray magaalada Muqdisho ee caasimadda Soomaaliya iyo degmada Marka.
Gudoomiyaha degmada Marka Maxamed Cismaan Cali Yariisow oo warbaahinta la hadlay ayaa sheegay in hawlgalku uu ujeedkiisu yahay sidii loo sugi lahaa amniga magaalada oo xiliyada qaar ay ka dhacaan falal amni darro ah iyo qaraxyo khasaaro dhaliya.
Gudoomiyaha ayaa ka gaabsaday inuu wax tafaasiil ah ka bixiyo hawlgalka ay saaka ka wadaan magaalada Marka balse waxa uu tilmaamay inuu warbaahinta la hadli doono marka uu soo gabagaboobo hawlgalka ay ku jiraan isla markaane uu ka warbixin doono.
RBC Radio
Xafiiska Muqdisho
Use Facebook to Comment on this Post
