Muqdisho(RBC Radio) Wasaarada maaliyada xukuumada Soomaaliya ayaa maanta aqoon isweydaarsi u furtay agaasimayaasha waaxyaha wasaarada maaliya iyo qorsheynta dalka munaasabada furitaanka aqoon isweydaarsigaas ayaa waxaa hadal ka jeediyey wasiirka wasaarada maaliyada iyo qorsheynta xukuumada Soomaaliya Max’uud Xasan Saleebaan Cawil oo sheegay in ujeedka aqoon isweydaarsigani uu salka ku hayo maadaama ay wasaaradu tahay 2 wasaaradood oo isku dhafan sidii loo kala saari lahaa shaqooyinka waax walba ay u xilsaaran tahay.
Wasiirka maaliyada iyo qorsheynta xukuumada Soomaaliya ayaa shaaca ka qaaday in maadaama ay wasaaradu hada noqotay hal wasaarad ay lagama maar maan tahay in la kala saaro shaqooyinka agaasimayaasha wasaarada,wuxuuna daboolka ka qaaday iney sidoo kale aqoon siweydaarsigan ku falanqeynayaan sidii loo dhamaystiri lahaa hab dhismeedka wasaarada oo hadda bilow ah.
Aqoon isweydaarsiga oo ay ka qayb galayaan agaasimayaasha iyo hawlwadeenada wasaarada Maaliyada iyo qorsheynta xukuumada Soomaaliya ayaa socon doona muddo 2 cisho ah waxaana inta uu socdo Siminaarkaasi la iskula meel dhigi doonaa sida ay u kala leeyihiin hawlaha wasaaradaas agaasimayaasha guud ee wasaarada Maaliyad.
Xukuumada Soomaaliya ayaa dadaal ugu jirtay sidii ay usoo nooleyn lahayd kaabayaashii dowladnimada oo gabi ahaanba ku basbeelay dagaaladii dalka ka socday 22-kii sano ee ina dhaafay waxaana hada muuqata horumar la taaban karo oo ay ku talaabsatay dowlada Cusub mudada kooban ee ay jirto.
RBC Radio
Xafiiska Wararka Muqdisho
Use Facebook to Comment on this Post
