Muqdisho (RBC) Faahfaahino dheeraad ah ayaa ka soo baxaya qarax ismiidaamin baabuur loo adeegsaday oo goor dhow ka dhacay afaafka hore ee xarunta Ex-Fiyoore ee ku dhow xarunta madaxtooyada Villa Soomaaliya ee magaalada Muqdisho.
Qaraxa ayaa illaa hadda la xaqiijiyey inuu ahaa baabuur miineysan oo uu watay nin miinooyin isku soo xiray kaasoo lala beegsaday baabuur kale oo uu saarnaa taliyaha ciidanka nabadsugida gobolka Banaadir Col. Khaliif Axmed Ereg oo dhaawac halis ah uu ka soo gaaray weerarkan.
Wariye ka tirsan Raxanreeb oo goobta tagay ayaa sheegaya in baabuur noociisu TOYOTA SURF oo la aaminsan yahay inuu miineysnaa uu isku qarxiyey baabuurkii uu saarnaa taliye Col. Khaliif Axmed Ereg oo marayey afaafka hore ee xarunta Ex-Fiyoore oo ay degan yihiin fannaaniin iyo qoysas barakacayaal ah abaare 12:50 waqtiga Muqdisho.
Khasaaraha dhimashada iyo dhaawaca
Col. Khaliif Axmed Ereg oo ku dhaawacmay qaraxa.
Illaa hadda saraakiisha booliska kama hadlin khasaaraha, hase yeeshee tirakoobyada hore ayaa sheegaya in dhimashada ay gaareyso illaa 7 ruux, halka dhaacwana ay gaarayaan in ka badan 10 ruux.
Dadka dhaawacmay waxaa ku jira taliyihii nabadsugida gobolka Banaadir Khaliif Axmed Ereg oo la rumeysan yahay inuu ahaa bartilmaameedka weerarkan. Xaalada taliyaha ayaa aad looga deyrinayaa, waxaana taliyaha la dhigay isbitaalka AMISOM ee ku yaalla xerada Xalane.
Dhaawacyada waxaa ku jira arday ka timid dugsi oo baabuur bas ahaa saarneyd kuwaasoo xilligaas ka soo laabanayey iskuulka. Sidoo kale dad wadada marayey, qaar fadhiyey maqaayad ku taallay goobta iyo askar ayaa ka mid ah dadka dhaawacmay.
Qaraxa ayaa si weyn u saameeyay dhammaan goobaha ku dhow goobta qaraxu ka dhacay sida Maqaayada Village oo ay fariistaan dad fara badan. Wariye ka shaqeynayey idaacad maxalli ah ayaa ku jira dadka dhaawacmay, siday Raxanreeb u sheegeen dad goobjoogayaal ah.
Dhismayaal dhowr ah oo uu ku jiro Tiyaatarka iyo guriga Hooyooyinka ayaa daaqaduhu ka daateen xoogga qaraxa awgiis. Sidoo kale baabuur isugu jirtay kuwo dad gaar ah wateen iyo gawaarida rakaabka oo wadada marayey ayaa halkaasi ku basbeelay.
Ciidamada dawlada oo isugu jira nabadsugida iyo booliska ayaa goobta soo gaaray, waxaana la xiray guud ahaan wadada marta iridka madaxtooyada. Baaritaano ayaa haatan ka socda halkaasi.
Ma jirto cid sheegatay masuuliyadda qaraxan ismiidaaminta ah illaa hadda, hase yeeshee waxaa qaraxyada noocan oo kale horey u geysan jiray kooxda Al Shabaab.
Faahfaahin dheeraad ah kala soco RBC Radio
Raxanreeb.com
Use Facebook to Comment on this Post
