Addis ababa(RBC Radio) Dowlada Ethiopia ayaa wadanka Eritrea ku eedeysay iney sii wadaan taageerida kooxda alshabaab ee dagaalka kawada Soomaaliya,afhayeenka wasaaradda arimaha dibadda dalka Ethiopia Dina Mufti ayaa daboolka ka qaaday in dalka Eritrea uu ku xadgudbay qaraarkii golaha ammaanka uu xayiraadda ku saaray hubka Soomaaliya.
Dina Mufti afhayeenka wasaaradda arimaha dibadda dowladda Ethiopia ayaa sheegay in Eritrea ay ku xadgudubtay go’aanka golaha ammaanka Qaramada Midoobay isla markaane ay sii wado taageerida kooxda argagixisada ah ee alshabaab sida uu hadalka u dhigay.
Afhayeenka wasaaradda arimaha dibadda ayaa hadalkan sheegay xilli uu waraysi siinayey Wargeyska afka dheer ee kasoo baxa wadanka SUudaan ee Sudan Tribune,wuxuuna tibaaxay in dalkiisu uu hayo cadeymo buuxa oo muujinaya in Eritrea ay gacan siineyso alshabaabka Soomaaliya.
Mr Mufti ayaa ka dhawaajiyey in xukuumadda Casmara ay xagal daacineyso dadaalada uu ururka Midowga Afrika ku doonayo inuu ku taageero soo celinta kala danbayntii iyo amnigii dalka Soomaaliya.
Dowladda Eritrea ayaa marar badan ku gacan sayrtay eedaha la xiriira iney taageero siiso alshabaab dagaalka kala soo horjeeda dowladda Soomaaliya iyo ciidanka nabad ilaalinta Midowga Afrika ee AMISOM oo kaabaya dowladda.
RBC Radio
Use Facebook to Comment on this Post
