Muqdisho(RBC Radio) Maamulka gobolka Banaadir ayaa maanta war cad kasoo saaray inaan Xoolaha lagu Gawrici karin meel ka baxsan Kawaanka Bari ee degmada C/casiis ee magaalada Muqdisho,wareegto uu ku saxeexnaa gudoomiyaha maamulka gobolka Banaadir Maxamed Axmed Nuur Tarsan ayaa waxaa saxaafadda u akhriyey afhayeenka gobolka Maxamed Yuusuf Cismaan.
afhayeenka ayaa sheegay in gudoomiyuhu uu farayo gudoomiyaasha degmooyinka gobolka Nabaadir iyo taliyaha ciidamada gobolka Banaadir iney fuliyaan amarkan kasoo baxay maamulka sare ee dowladda hoose ee Muqdisho kaasoo tilmaamaya in wixii ka danbeeya 30ka bishan July aan Xoolo lagu Gowrici karin meel aan ka ahayn Kawaanka Hilibka degmada C/casiis ee loo yaqaan Kawaan Bari.
Wuxuuna tilmaamay afhayeenka maamulka gobolka Banaadir in maamulku uu amarkan uga gol leeyahay sidii loo ilaalin lahaa Nadaafadda,Bilicda iyo caafimaadka deegaanka magaalada Muqdisho ee caasimadda Soomaaliya,wareegta ayaa amar ku siinaysa gudoomiyaasha degmooyinka iney hubiyaan dhaqan galka amarkan kasoo baxay maamulka gobolka Banaadir.
Kawaanka Bari ee degmada C/casiis ayaa waxaa maalmihii danbe ku socday dib u dhis baaxad leh oo lagu dayactirayey Kawaanka oo ku burburay dagaaladii sokeeye ee dalka soo maray,waxaana xiligan loogu tala galay in Kawaanku uu daboolo Baahiyo fara badan isagoona la dhigay dhammaan qalanka ay ku shaqeeyaan Kawaannadu.
RBC Radio
Muqdisho
Use Facebook to Comment on this Post
