New York(RBC Radio) Hay’adda UNHCR ee Qaramada Midoobay u qaabilsan Qaxootiga adduunka ayaa ku sheegtay warbixin ay soo saartay iney sii kordhayaan Qaxootiga Soomaaliyeed ee dib ugu laabanaya dalkooda kuwaas oo mudda badan Qaxooti ku ahaa dalalka deriska la ah Soomaaliya ee Kenya,Ethipio,Jabuuti iyo Yaman
Hay’adaa Qaxootiga adduunka UNHCR iyo xafiiska isku dubaridka gargaarka Aadanaha Qaramada Midoobay ee Soomaaliya ayaa si wada jir ah uga hadlay soo laabashada Qaxootiga Soomaaliyeed,waxayna sheegeen in tani ay marqaati u tahay horumarka dhanka amniga ah ee ay Soomaaliya ku tallaabsatay.
Warbixinta UNHCR ayaa lagu sheegey in dad gaaraya ilaa 18-kun oo ruux kuwaas oo Qoxooti ku ahaa wadamada deriska la ah Soomaaliya iney dib ugu noqdeen dalkooda Soomaaliya,markii ay dareemeen horumarka bilowga ah ee laga gaaray dhanka amniga.
Xog-hayaha guud ee Qaramada Midoobay Ban-ki Moon oo ka hadlayey shirka horumarinta qaaradda Afrika TICAD ee kusoo gabagaboobay Yokohama Japan ayaa ku booriyey beeshaa caalamka sidii ay kaalin weyn uga qaadan lahaayeen dib usoo celinta boqolaalka Kun oo Qaxootiga Soomaaliyeed,kuwaas oo intooda badabn ku dhibaataysan xeryaha Qaxtootiga dalalka Kenya iyo Yaman
Soomaaliya ayaa lambarka 3-aad kaga jirta wadamada ugu Qaxootiga badan waxaana ka horeeya oo kaliya wadamada Ciraaq iyo Afgaanistaan,dadkan Soomaaliyeed ayaa dalkooda kasoo baxsayaday markii uu qarxay dagaalkii sokeeye ee dalka ka bilowday horraantii Sagaashamaadkii,waxaana maalin walba dalka ka cararayey dad Soomaaliyeed oo u adkeysan waayey dhibaatada dagaalada dalka ka socday.
RBC Radio
Xafiiska Wararka Muqdisho
Use Facebook to Comment on this Post
