Kismaayo (RBC) Wararka naga soo gaaraya deegaanka Goobweyn oo qiyaastii 20 Km dhanka waqooyi ka xiga magaalada Kismaayo ayaa sheegaya in baabuur nooca yar yar ah oo ay saarnaayeen saraakiil ka mid ah Xarakada Al Shabaab ay kula kacday miino inta u dhexeysa Goobweyn iyo Ma-Dhamaato.
Qaraxan ayaa sida dad deegaanka ah u sheegeen Raxanreeb dhacay abaare 10:00 subaxnimo ee maanta [Arbaco 13/03/2013] xilli baabuurka yar ee ay saarnaayen saraakiisha Al Shabaab uu marayey wadada u dhexeysa Goobweyn iyo Ma-Dhamaato oo aan sidaa u kala fogeyn.
Ilo wareedka ayaa Raxanreeb u sheegay in saddex sarkaal oo Al Shabaab ciidankooda ka tirsan ay ku dhinteen halka labo ruux oo kale oo isla Shabaabka ka mid ah ay ku dhaawacmeen.
Dhaawaca iyo meydka ayaa loo qaaday degmada Jilib oo uu ku yaalo saldhiga ugu weyn Al Shabaab ee gobollada Jubbooyinka.
Wararka ku saabsan qaraxan oo ay aad u adkeyd in la ogaado maadaama ay deegaanka ka taliyaan Al Shabaab darteed ayaa kaliftay inaan xog badan laga ogaanin magacyada saraakiisha Al Shabaab qaraxan kaga geeriyooday. Sidoo kale wax faahfaahin ah lagama hayo qaraxa miinada ee baabuurka lala beegsaday inay ahayd mid loo diyaariyey iyo inay ahayd miino horey halkaasi ugu jirtay.
Qof ku sugan degmada Jilib oo aan rabin in magaciisa xigano ayaa Raxanreeb u sheegay in maanta duhurkii magaalada la geeyay baabuur dhaawac iyo meyd sida kuwaasoo ka yimid dhanka deegaanka Goobweyn.
RBC Radio
Use Facebook to Comment on this Post
