Muqdisho(RBC Radio) Sheekh Xasan Daahir Aweys oo ka tirsan hogaamiyaasha alshabaab ayaa eed kulul ujeediyey hogaamiyaha ugu sareeya ururka alshabaab Axmed Cabdi Gidane oo alshabaabku ay u yaqaanaan Sheekh Mukhtaar C/raxmaan Abu Zubeyr.
Sheekhg Xasan Daahir Aweys ayaa Axmed Godane ku eedeeyey inuu maroorsaday taladii kooxda alshabaab,wuxuuna tilmaamay inuu ku sifoobay kaligii talisnimo,xukunkii iyo taladii alshabaabne uu kaligii isku koobay isla markaane uu iska dhega tiray dhegeysiga talooyinka ragga kale ee ka tirsan saraakiisha alshabaab.
Waxa ka jira dilka Abu Mansuur Al-amriki
Xasan Daahir Aweys oo wareysi siinayey telefishinka Somali Channel ayaa la weydiiyey waxa ka jira in Abu Mansuur Am-amriki uu la dilay,wuxuuna kaga jawaabay in Abu Mansuur Al-amriki uu wali noolyahay balse wuxuu qiray in Axmed Godane uu isku dayey inuu Khaarajiyo Al-amriki.
Wuxuuna intaa raaciyey in hogaamiyaha alshabaab Godane uu ku raadjoogo Abu Mansuur isla markaane uu qorsheynayo inuu ka takhaluso,wuxuuna isweydiiyey sababta keentay in la gooyo naf Muslim ah oo aan diinta ka bixin isla markaane aan muteysan dilka.
Wuxuuna daboolka ka qaaday in Axmed Godane uu baneystay dhiigga dalka Muslimiinta ah,wuxuuna u aaneeyey sababta uu Abu Mansuur u bartilmaameedsanayo iney tahay inuu kasoo horjeestay hab dhaqankiisa oo ah mid aysan jecleysan inta badan hogaamiyaasha kale ee alshabaab sida uu tilmaamay.
Dadka la iska dilayo
Sheekh Xasan Daahir Aweys ayaa Godane ku eedeeyey inuu awaamiir ku bixiyo in la iska dilo dad aan waxba galabsan oo Muslimiin ah,wuxuuna tilmaamay iney marar badan kala taliyeen inuu ka waantoobo dilka dadka Muslimiinta ah sida uu tilmaamay Sheekh Aweys.
Wuxuuna shaaca ka qaaday iney tahay wax laga xumaado in micna darro loo daadiyo dhiigga dadka Muslimiinta ah ee aan waxba galabsan,Xasan Daahir ayaa qiray iney dhab tahay in la gumaaday dadkii bulshada waxgalka u ahaa.
Cabashada ay u direen Al-qaacidda
Sheekh Xasan Daahir Aweys ayaa oo wax laga weydiiyey waxa ka jira in saraakiil uu isagu ka mid yahay ay waraaq cabasho ah u direen hogaamiyaha ugu sareeya urur weynaha Al-qaacidda Ayman Al-dawaahiri,wuxuuna sheegay iney sax tahay oo ay dhaqamada Axmed Godane uga cawdeen hogaanka Al-qaacidda.
Sheekh Aweys ayaa sheegay in markii la arkay sida uu u xumaaday hogaankii alshabaab uu nin walba oo kooxda ka mid ahaa uu go’aansaday inuu wax ku saxo wixii uu awoodo,Xasan Daahir ayaa ugu danbeyntii ka digay Cawaaqib xumo uu sheegay iney ka dhalan doonto dhaqamada hogaamiyaha ugu sareeya alshabaab uu hada ku hogaaminayo kooxda,wuxuuna tilmaamay iney Soomaaliya ka dhici doonto wixii ka dhacay dalka al-jeeriya oo islaamiyiintii qabsaday markii dalka laga saaray ay dhibaato aad u fool xun ay kula dhaqaaqeen dadkii rayidka ahaa ee dalkaas arintaas oo dhaawacday sharaftii Islaamka sida uu tilmaamay.
RBC Radio
Xafiiska Wararka Muqdisho
Use Facebook to Comment on this Post
