Kismaayo (RBC) Col. Barre Aadan Shire Hiiraale oo horey xildhibaan iyo wasiirba uga soo noqday dawladihii ku-meelgaarka ayaa xaqiijiyey inuu ku sugan yahay magaalada Kismaayo kadib markii uu halkaasi yimid saacadihii la soo dhaafay.
Col. Barre oo la hadlay idaacadaha gudaha ayaa sheegay inuu soo gaaray Kismaayo saacado ka hor uuna ku yimid si nabad ah, sida uu sheegayna uu u yimid inuu ka qeybqaato hawlo nabadeyn ah.
Barre ma bixin war intaasi dhaafsan, wuxuuna ku celceliyey inuu yimid deegaankiisa uuna ka mid yahay bulshada waxgaradka ah ee reer Jubbada Hoose.
Dhanka kale warar laga helayo xubno maamulka Kismaayo ka tirsan oo magacooda ka gaabsaday ayaa sheegay in Col. Barre Hiiraale iyo maleeshiyo isaga ilaalo u ah ay ka soo degeen doon ay ka soo raaceen magaalada Muqdisho, sida ay saraakiisha sheegeen.
Dad ku sugan Kismaayo ayaa sheegay in maalmihii la soo dhaafay hakad la geliyey duulimaadyada diyaaradaha gudaha u kala goosha gaar ahaan shirkad labo jeer duulimaad ku tagta Kismaayo iyo Muqdisho. Ma cadda sababta loo hakiyey duulimaadyada Kismaayo iyo Muqdisho, maamulka Kismaayana kama hadlin arrinkaasi.
Tegista Col. Barre Hiiraale ayaa ku soo beegantay xilli uu meel dhexe marayo shirkii maamul u sameynta Jubbooyinka ee ka socda Kismaayo, kaasoo hadda u gudbay marxaladiisa labaad ee doorshada madaxweynaha.
RBC Radio
Use Facebook to Comment on this Post
