Ceelasha-biyaha(RBC Radio) Wararka aan ka heleyno deegaanka Ceelasha biyaha ee duleedka magaalada Muqdisho ee caasimada Soomaaliya ayaa ku waramaya in halkaas uu xalay ka kacay dab baaxad weyn kaasoo geystay khasaare fara badan oo hantiyeed.
Dabka ayaa la sheegayaa inuu ka kacay Maqaayad ku taalla bartmaha suuqa deegaanka Ceelasha biyaha dabkaas oo markii danbe ku fiday goobo ganacsi oo ka agdhawaa maqaayada uu ka bilowday waxaana ku basbeelay 10 dukaan oo ku yaalay suuqa uu dabku ka kacay.
Dadka deegaanka iyo ganacsatada suuqa deegaanka Ceelasha biyaha oo iskaashanaya ayaa u guntada sidii ay dabkaasi u damin lahaayeen,saacado kadib ayeyna ku guuleysteen bakhtiinta dabkaas oo khasaare lixaad oo hantiyeed gaarsiiyey ganacsatadii ay ku basbeeleen goobahooda ganacsi.
Goobta uu dabku ka kacay ayaa waxaa gaaray masuuliyiinta dowlada ee gobolka iyo saraakiisha ciidamada amniga, goobta gubaneysay ayaa waxaa si weyn u ilaalinayey nabadgalyadeeda ciidamada dowlada mana jirin wax boob ah oo goobta ka dhacay.
RBC Radio
Xafiiska Wararka Muqdisho
Use Facebook to Comment on this Post
