Hargeysa(RBC):- Madaxweynaha Somaliland Axmed Maxamed Maxamuud (Siilaanyo), ayaa Guddi isugu jirta Wasiirro, Xildhibaanno, Masuuliyiin Xukuumadda ka tirsan iyo Shaqsiyaad Somaliland caanka ah u magacaabay diyaarinta Aas loo samaynayo Maayerkii magaalada Hargeysa Marxuun Eng. Yuusuf Warsame Siciid oo salaaddii hore ee saaka ku geeriyooday Isbitaal ku yaalla magaalada Dubai ee dalka isu-tagga Imaaraadka Carabta.
Madaxweyne Axmed-Siilaanyo magacaabista Guddiga Aaska Marxuumka waxa uu Tacsi tiiraanyo leh u diray guud ahaanba Shacabka Somaliland, gaar ahaan qoyska, qaraabada, ehelada iyo asxaabta uu Marxuumku ka baxay. Waxaanu Illaahay uga beryey inuu Marxuumk Yuusuf Warsame naxariistii Janno ka waraabiyo, Samir iyo Iimaan saadiq ahna ka siiyo, qoyska, ehelada, qaraabada, asxaabta, golaha deegaanka Hargeysa iyo Shacabka Somaliland-ba.
Qoraal ka soo baxay Xafiiska Afhayeenka madaxtooyada Somaliland maanta, ayaa lagu faahfaahiyey Guddiga uu Madaxweyne Axmed-Siilaanyo u magacaabay diyaarinta aaska loo samaynayey Duqii magaalada Hargeysa, ahaana Guddoomiyaha golaha deegaanka Hargeysa, Marxuum Eng. Yuusuf Warsame Siciid, waxaanu warkaasi u qornaa sidan:-
“Madaxweynaha Somaliland Mudane, Axmed Maxamed Maxamuud (Silaanyo) waxa uu Digreeto Madaxweyne oo Sumadeedu tahay JSL/M/MG/083-1696/042013 ku magacaabay Guddi qaban-qaabo oo u xil-saaran Aaska Marxuumkaasi, Guddidaas oo ka kooban 15 Xubnood waxa Guddoomiye u ah Wasiirka Arrimaha Gudaha Maxamed Nuur Carraale (Duur).
Magacaabidda Madaxweynaha:-
Ku: Wasiirka Wasaaradda Arrimaha Gudaha (Guddoomiye) Hargeysa
Ku: Wasiirka Wasaaradda Diinta iyo Awqaafta Hargeysa
Ku: Wasiirka Wasaaradda Waxbarashadda iyo Tacliinta sare Hargeysa
Ku: Wasiirka Wasaaradda Dhalinyarada, Ciyaaraha iyo Dhaqanka Hargeysa
Ku: Wasiirka Wasaaradda Kalluumaysigga iyo Khayraadka Badda Hargeysa
Ku: Wasiir Ku-xigeenka Wasaarrada Warfaafinta, Dh. Iyo Wacyigelinta Hargeysa
Ku: Taliyaha Ciidanka Booliiska Hargeysa
Ku: Maayar Ku-xigeenka Caasimadda Hargeysa Hargeysa
Ku: Xoghayaha D/Hoose ee Caasimadda Hargeysa Hargeysa
Ku: Guddoomiyaha Xafiiska Xildhiidhka Golayaasha ee Madaxtooyadda Hargeysa
Ku: Xildhibaan Axmed Cabdi Kijaandhe Hargeysa
Ku: Xildhibaan Maxamuud Axmed Oobsiiye Hargeysa
Ku: Mudane, Maxamed Baarjeex Hargeysa
Ku: Mudane, Cali Cumar Xasan Guuleed Hargeysa
Ku: Marwo, Aamina Yusuf Aar Hargeysa
Ujeedo: Magacaabid Guddida Aaska Marxuun Yuusuf Warsame Siciid
Mudanayaal iyo Marwooyin,
Sida aad ka warhaysaan, waxa Shacbiga Somaliland ka baxay oo geeriyooday Alle ha u naxariistee Maayarkii Caasimadda Hargeysa Marxuun Yuusuf Warsame Siciid. Sidaas darteed, Mudanayaal, waxa aan idiin magacaabay Guddida qaban-qaabadda Aaska Marxuun Yuusuf Warsame Siciid. Waxaan idinka rejaynayaa inaad xil waafiya iska saari doontaan, isla markaana si milgo iyo maamuus leh u diyaarin doontaan aaska Marxuunka.” Sidaa ayaa lagu yiri qoraalka magacaabista ee ka soo baxay madaxtooyada Somaliland galabta.
RBC Radio
Xafiiska wararka ee Hargeysa.
Use Facebook to Comment on this Post
