Dubai(RBC):- Allaah ha u naxariistee, Maayerkii magaalada Hargeysa ee Caasimadda Maamulka Somaliland Eng. Yuusuf Warsame Siciid, ayaa salaaddii hore ee saaka ku geeriyooday Cisbitaal ku yaalla magaalada Dubai ee dalka Isu-tagga Imaaraadka Carabta oo uu dhawrkii bilood ee u dambeeyey xaalad caafimaad-darro u yaallay.
Marxuum Eng. Yuusuf Warsame Siciid ayaa ka mid ahaa Xildhibaannada golaha deegaanka magaalada Hargeysa ee lagu soo doortay doorashadii dawladaha hoose ee Somaliland ka qabsoontay 28-kii November 2012-kii, isla markaana laga soo dhex-doortay Xisibiga talada Somaliland haya ee KULMIYE, waxaanu Yuusuf Warsame Siciid ku guulaystay in markii ugu horreysay ee Xildhibaannada golaha deegaanku fadhiistaan ay u doortaan Guddoomiyaha golaha deegaanka, ahna Duqa Caasimadda Hargeysa.
Illaahay naxariistii Janno haka waraabiyo ee Eng. Yuusuf Warsame Siciid waxa xaalad caafimaad-darro haleeshay maalmo kooban markii uu xilka Maayernimo hayey, waxaana loo qaaday dalka Jabuuti oo markii dambe looga sii qaaday magaalada Dubai oo la dhigay Cisbitaal lagu magacaabo Al-Jazeera Huspital oo ku yaalla magaaladaas, halkaas oo muddo bilo ah lagu dawaynayey.
Marxuumka, ayaa laga soo qaadi doonaa magaalada Dubai ee dalka Isu-tagga Imaaraadka Carabta, iyada oo aas ballaadhan loogu samayn doono magaalada Hargeysa. Illaahay naxariistii Janno haka waraabiyo Marxuum Yuusuf Warsame Siciid.
RBC Radio
Xafiiska wararka ee Hargeysa.
Use Facebook to Comment on this Post
