Kismaayo(RBC Radio) Shilalka gaadiidka ayaa lasoo sheegayaa iney kusoo badanayaan magaalada Kismaayo ee xarunta gobolka Jubada hoos waxaana lasoo sheegayaa in inta badan bukaanada jiifa Cisbtaalka guud ee magaalada Kismaayo ay yihiin dhaawacyo kusoo waxyeeloobay shilalka gawaarida ee ka dhaca gudaha magaalada Kismaayo.
Soo badashada shilalka gaadiidka ayaa waxaa loo aaneynayaa kadib markii magaalada kusoo bateen gaadiidka noocyada raaxada kuwaas oo ay wataan dadka qurba joogta oo si weyn u buux dhaafiyey magaalada Kismaayo yan iyo wixii ka danbeeyey markii alshabaab dagaalka looga saaraya magaalada.
Agaasimaha Cisbitaalka guud ee magaalada Kismaayo Cabdi Samad Abiikar oo la hadlay warbaahinta ayaa sheegay in bukaanada ugu badan ee jiifa Cisbitaalka guud ee magaalada Kismaayo ay yihiin kuwa kusoo waxyeeloobay shilal gaadiid oo ka dhacay gudaha magaalada.
Wuxuuna sheegay in Cisbitaalka ay hada Jiifaan bukaano gaaraya ilaa 65 bukaan oo uu sheegay in badankoodu ay la ildaran yihiin dhaawacyo kasoo gaaray shilal gaadiid oo ay galeen,wuxuuna tilmaamay iney kala hadleen maamulka kumeelgaarka ah ee xiliga ka arimiya magaalada Kismaayo sidii wax looga qaban lahaa sii badasha shilalka gaadiidka ee magaaladaas.
RBC Radio
Xafiiska Wararka Muqdisho
Use Facebook to Comment on this Post
