Beledweyne (RBC) Taliska ciidamada AMISOM ayaa ka tacsiyeeyay geerida askari ka mid ahaa ciidamada Jabuuti eeku sugan magaalada Beledweyne kaasoo shalay [Axad] subaxnimadii ku dhintay miino kula qaraxday xilli uu ku jiray hawl miino saaris ah.
War saxaafadeed ka soo baxay madaxa AMISOM Danjire Salah Annadif ayaa lagu sheegay in askarigaasi uu ku dhintay ka dib markii ciidamada Jabuuti subaxnimadii hore ay bilaabeen miino saaris goob lagu soo sheegay inay miino ku jirtay, halkasoo askaroga iyo dhowr kale ay isku dayeen inay miinada ka saaraan balse ay kula qaraxday oo naftiisa uu ku waayey.
War saxaafadeedka ayaa sidoo kale lagu sheegay in saddex askari oo kale ay ku dhaawacmeen qaraxaasi oo ka dhashay rasaasta baasuukaha.
“Madaxa AMISOM waxa uu tacsi kal iyo laabah u dirayaa ciidamada Jabuuti iyo shacabka reer Jabuuti oo askari ka mid ah ciidamadooda ku waayey Beledweyne” ayaa lagu yiri war saxaafadeedka.
Taliska AMISOM waxay sheegeen in saddexda askari ee dhaawacantay loo soo qaaday isbitaalka AMISOM ee magaalada Muqdisho si loogu daweeyo.
Dhimashadan ayaa ah midii saddexaad oo ciidamada Jabuuti ay askari ku waayaan gudaha Beledweyne sanadkan, iyadoo mudo hal bil gudaheed ah ay labo askari kaga dhimatay Beledweyne ciidamada Jabuuti ee ku sugan Hiiraan ee qeybta ka ah hawlgalka AMISOM.
RBC Radio
Use Facebook to Comment on this Post
