Jowhar(RBC Radio) Masuuliyiinta maamulka gobolka Shabeelaha dhexe ayaa tafaasiil ka bixiyay booqasho ay shalay gobolkaas ku tageen xubno ka socday Qaramada Midoobe oo gobolka u tagay inay soo qiimeeyaan khasaaraha ka dhashay fadataahada uu wabigu ka gaystay deegaanada gobolka iyo xaaladaha Bini’aadanimo ee ka jirtay gobolka Shabeelaha dhexe.
Gudoomiye ku xigeenka dhanka siyaasada gobolka Shabeelaha dhexe Mudane Yuusuf Cabdi ayaa ka warbixiyay booqasho ay shalay gobolka ku tageen masuuliyiin uu hogaaminayay isku duwaha gargaarka Bini’aadanimo ee QM u qaabilsan Soomaaliya Filib Lasaraani.
Yuusuf Cabdi ayaa sheegay in masuuliyiinta shalay gobolka soo gaartay ay u koorgeli doonaan xaalada Bini’aadanimo ee gobolka jirta iyo khasaaraha uu wabiga Shabeelle ka gaystay deegaanada gobolka Shabeelaha dhexe.
Dhanka kale gudoomiye ku xigeenka ayaa tibaaxay in wafdiga caalamiga ah ee shalay yimid magaalada Jowhar ay kormeereen xarumo ay Jowhar ka degenyihiin dadka kasoo barakacay deegaanada gobolka , wuxuuna xusay inay warbixinno ku saabsan xaaladaha Bini’aadanimo ee gobolka ka jira ay ka dhagaysteen masuuliyiinta maamulka gobolka.
Wafdiga balaaran ee shalay gaaraya magaalada Jowhar ee xarunta gobolka Shabeelaha dhexe ayaa u kuurgeli doona xaalada adag ee ka taagay deegaanada gobolka iyo khasaaraha uu wabigu u gaystay shacabka gobolka Shabeelaha dhexe
RBC Radio
Xafiiska Muqdisho
Use Facebook to Comment on this Post
