Madaxweynaha Puntland ahna Musharax u taagan doorashada Madaxtooyada 8 Jan, 2014 Dr. Cabdiraxamaan Sh. Maxamed Maxamuud (Faroole) ayaa maalinimadii shalay diray fariin muuqaal ah taas oo uu kaga hadlayey sababaha ku dhaliyey inuu markale u tartamo xafiiska & Qorshihiisa waxqabad.
Madaxweyne Faroole
Wuxuu xusay in Dastuurka Puntland xaq u siinayo Madaxweyne kasta oo xafiiska jooga inuu mar labaad is sharaxo marka ay soo idlaato mudo xileedkiisa koowaad (Frist term).
“…Waxaan go’aansaday in aan mar labaad isu soo taago doorashada madaxtinimada Puntland, Dastuurku wuxuu qorayaa in qofku madaxweyne isu taagi karo labo jeer…”
Dr. Faroole wuxuu hoosta ka xariiqay inuusan xukun jacayl dartiis isu sharaxin balse uu go’aankan qaatay kadib markii uu garowsaday sida ay lagama maarmaan u tahay inuu dhamaystiro mashaariicda socota, kuwa qorshaysan & meelmarinta hanaanka federaalka Soomaaliya.
Wuxuu balanqaaday inuu uga faa’iideyn doono khibradiisa maamul & Waayo aragnimadiisa shaqo dadkiisa & dalkiisa isla markaana uu ku haminayo inuu hawl gab noqdo iyadoo umada Soomaaliyeed mid ah soona ceshatay sharaftii & karaamadii ay ku lahayd aduunka.
“… Waxaan ku haminayaa in aan ku hawl gabo Soomaaliya oo mid ah, is jecel oo nidaamkii lagu heshiiyey ee federaalku uu dhamaystirmo oo meel walba state ka dhismo danaha deegaankooda & horumarkoodana hanta …” Ayuu yiri Madaxweyne Faroole.
Mashaariicda socota.
Xukuumada Puntland ee uu hogaanka u hayo Madaxweyne Dr. Cabdiraxmaan Sh. Maxamed Maxamuud (Faroole) ayaa hada gacanta ku haysa dhismahooda Garoomada diyaaradaha ee Boosaaso, Garoowe, Gaalkacayo & Mashaariic kale oo baaxad leh.
Garoonka diyaaradaha Boosaaso ayaa la bixiyey qandaraaskii lagu dhisi lahaa waxaana gacan ka geysatay dowlada Talyaaniga halka hay’ada UNOPS ay kala shaqaynayso dowlada sidii loo fulin lahaa mashruucaas.
Dayactir lagu sameeyo wadada laamiga ah ee isku xirta Gaalkacayo & Garoowe ayaa ka mid ah mashaariircada qorshaysan halka dhismaha Jaamacada Maakhir ee Degmada Badhan gacanta lagu hayo dhaqaalihii ku bixi lahaa.
Jidadka, Kobcinta kaabayaasha dhaqaalaha & Adeegyada bulshada sida caafimaadka & Waxbarashada ayaa dhamaantood siyaabo gaargaar ah u qorshaysan kuwaas oo xukuumada ay ka taageeri doonaan ururo caalami ah & wadamo ay xiriir saaxiibtinimo la wadaagto.
Arrimaha Soomaaliya.
Siyaasada Soomaaliya ayaa gashay weji cusub iyadoo loo gudbay dowlada rasmi ah waxaana hada dadaal & dagaal siyaasadeed u baahan sidii loo hirgelin lahaa nidaamka federaalka loona meel marin lahaa Dastuur rasmi ah oo u qeexaya qolo (maamul) walba xuquuqdooda gaarka ah.
Madaxweyne Faroole doorkii muuqday ee uu ka soo ciyaaray hirgelintii khariiradii ro’ad map, Ka bixitaankii KMG-nimada & xogogaalnimada uu u yahay arrimaha Soomaaliya ayaa muhiimad gaar ah u yeelaya sii joogitaankiisa xafiiska.
Xafiiska Warfaafinta Gudiga Ololaha
Madaxweyne/ Musharax Dr. Cabdiraxmaan Sh. Maxamed Maxamuud (Faroole)
Email: faroole.election2014@gmail.com Facebook: Puntland President Office
Use Facebook to Comment on this Post
