Musharax Cali Xaaji Warsame oo la Kulmay Dhalinyarada ku dhaqan gobolka Bari (Sawirro)

Boosaaso(RBC Radio) Musharaxa u taagan xilka Madaxtinimada Puntland Dr Cali Xaaji Warsame ayaa xalay kulan la qaatay Gollaha dhalinyarada ee gobolka Bari gaar ahaana magaaladda Boosaaso.

Musharax Cali Xaaji Warsame oo dhalinyarada ku qaabilay hoyga uu ka deganyahay magaaladda Boosaaso ayaa kulankoodu ahaa mid ay isku xog wareysanayeen isla markaana dhalintu su’aalo xaaladda Puntland mareyso ku weydiiyey.

Dr Cali Xaaji Warsame oo ugu horeyn kulanka furay ayaa sheegay iney farxad u tahay in uu la kulmo dhalinyarada gobolka Bari gaar ahaana magaaladda Boosaaso,wuxuuna sheegay in kulankan uu yahay kii labaad ee u la qaato bulshada gobolka Bari.

Wuxuu sheegay in ka mid ahaanshiisa dhanka Siyaasada ay muhiim u tahay dhalinyarada maadaama dhalinyaradu yihiin kuwa xaqa u leh hoggaaminta dalka weliba uu qudhiisu kamid yahay dhalinyarada dalka.

Sidoo kale,dhalinyaradii kulanka kala qeybgashay ayuu u sheegay in Madaxweynaha dowladda Puntland uu dhawaan ka dhawaajiyey in qof ka weyn 70 sano jir uusan qabaneyn talada Puntland.

Musharax Dr Cali Xaaji Faarax iyo dhalinyaradii kulanka ka qeybgashay ayaa fariin u diray Madaxweynaha Puntland Cabdirixmaan Faroole iyo Musharaxiinta u taagan Doorashada soo socota 2014.

……””Musharaxiinta iyo Madaxweynaha waxaan ugu yeereynaa inaan wada fariisano anagoo Puntland u daneyneyna……”””””ayuu yiri Musharax Cali Xaaji .

Guddoomiyaha Gollaha dhalinyarada gobolka Bari Faarax Cali Cumar(Faarax Shaam) ayaa isna dhalinkiisa sheegay in musharax walba marka uu ku jiro wakhtiga Ololihiisa uu bulshada u sheego hadalo iyo ballanqaadyo been ah,wuxuuna intaas ku daray iney u baahanyihiin Hoggaamiye daacad ah.

Dhanka kale Mustafe Siciid Saalim oo kamid ahaa dhalintii xalay la kulmay Musharax Dr Cali Xaaji Warsame ayaa sheegay in loo baahanyahay in dhaqo abuur loo sameeyo dhalintada reer Puntland,lagana doonayo cid kasta oo Jagadaas ku guuleysta

Qaar kamid ah dhalinyaradii kulanka la qaadatay Dr Cali Xaaji Warsame ayaa weydiiyey su’aalo ku aadan waxqabadkiisa haddii xilkaas uu qabto iyo Isbadelka uu Puntland u horseedi doono,waxaana dhammaan uu ka jawaabay su’aalahaas oo idil,iyagoona tallooyin wax ku ool ah usoo jeediyey.

Si kastaba kulankan ayaa qeyb ka ah Ololaha uu ku jiro Musharax Dr Cali Xaaji Warsame,wuxuuna kulamo gaar gaar ah la qaadanayey qeybaha bulshada ee gobolka Bari maalimihii u danbeeyey.