Jowhar(RBC) Madaxweynaha dowladda federaalka Soomaaliya Xasan SH Maxamuud iyo waftiga uu hogaaminayo ayaa daqiiqado ka hor gaaray magaalada Jowhar ee xarunta gobolka Shabeelaha dhexe,madaxweynaha iyo waftigiisa oo xalay ku hoyday magaalada Beledweyne ayaa goordhaweyd gaaray magaalada Jowhar halkaas oo si diiran loogu soo dhaweeyey.
Madaxweynaha ayaa diyaaradii siday waxa ay ku dajisay garoonka diyaaradaha magaalada Muqdisho ee caasimadda Soomaaliya,wuxuuna intaa kadib guda galay safar dhanka dhulka ah,madaxweynaha ayaa intii uu safarka ku jiray ku hakaday degmada Balcad ee gobolka Shabeelaha hoose halkaas oo uu kula hadlay boqolaal dadweyne ah oo isugu soo baxay soo dhaweyntiisa.
Madaxweynaha ayaa kasii gudbay degmada Balcad wuxuuna daqiiqado ka hor gaaray magaalada Jowhar ee xarunta gobolka Shabeelaha dhexe,aminga magaaladaasi ayaa waxaa si weyn u adkaynaya ciidamada dowladda federaalka Soomaaliya iyo kuwa nabad ilaalinta AMISOM.
Kumanaan dadweyne ah oo usoo bannaanbaxay soo dhaweynta madaxweynaha Jamhuuriyadda federaalka Soomaaliya ayaa lagu arkayaa wadooyinka waaweyn ee magaalada Jowhar,Safarka madaxweynaha ayaa saamayn ku yeeshay isu socodka gaadiidka iyo dhaqdhaqaaqa ganacsiga guud ahaan magaalada Jowhar,masuuliyiinta maamulka gobolka Shabeelaha dhexe ayaa madaxweynaha kaga hortagay bannaanka magaalada Jowhar,waxayna usoo galbiyeen gudaha magaalada.
Sida ay sheegayaan wararka aynu ka heleyno magaalada Jowhar madaxweynaha ayaa la filayaa inuu la hadlo dadweynaha ku dhaqan magaaladaasi isla markaane uu kulamo la qaato madaxda maamulka iyo bulshada qaybaheeda kala duwan,waxaana goobaha qaar ee magaalada lagu xiray Cod baahiyaal loogu tala galay iney dadweynuhu ka dhegeystaan Khudbadda madaxweynaha.
Lama oga in madaxweyne Xasan SH Maxamuud uu caawa ku hoyan doono magaalada Jowhar iyo inkale,masuuliyiinta maamulka gobolka Shabeelaha dhexe oo aan la xiriirnay ayaa ka gaabsaday iney ka hadlaan mudada ay qaadanayso safarka madaxweynaha ee magaalada Jowhar
RBC Radio
Xafiiska Muqdisho
Use Facebook to Comment on this Post
